اعىلشىن ءتىلىن ءبىر مۇعالىمگە ۇيرەتۋ ءۇشىن قانشا قاراجات جۇمسالاتىنى بەلگىلى بولدى

استانا. قازاقپارات - بۇگىن استانادا وتكەن باسپا ءسوز ءماسليحاتىندا مينيسترلىكتىڭ مەكتەپكە دەيىنگى جانە ورتا ءبىلىم بەرۋ دەپارتامەنتى ديرەكتورىنىڭ ورىنباسارى زەينەپ ماقسۇتوۆا اتالعان جوباعا بولىنگەن اقشانىڭ كولەمىن جاريالادى، دەپ حابارلايدى قازاقپارات ءتىلشىسى.

استانا، الماتى مەن قاراعاندى قالالارىندا 25 مۇعالىمنەن تاڭدالىپ، جالپى 75 مەكتەپ وقىتۋشىسى حيميا، فيزيكا، بيولوگيا مەن ينفورماتيكا پاندەرىن اعىلشىن تىلىندە تۇسىندىرۋگە ۇيرەنىپ ءجۇر. ولار ءۇشىن ارنايى باعدارلاما جاسالدى. ءبىلىم جانە عىلىم مينيسترلىگىنىڭ وسى تاپسىرىسىن Professional development centre الىپ وتىر. «ءيا، ونداي جوبا بار. راس، بۇگىندە 75 مۇعالىمدى قاراعاندى، استانا مەن الماتى قالالارىندا، ءاربىر قالادا 25 مۇعالىمنەن وقىتىپ جاتىرمىز. ولار وسىمەن توقتاپ قالمايدى، ءوز بىلىمدەرىن ارى قاراي شىڭدايتىن بولادى. تاجىريبەگە ەنگىزەدى. قولدارىنان كەلسە، ارىپتەستەرىن دە وقىتۋعا تىرىسادى. ءاربىر مۇعالىمدى ءبىز قاداعالاپ، الىپ جۇرەمىز. قارجىسىن مەن ناقتى ايتا المايمىن. ءبىراق جاڭاعى 75 مۇعالىمدىكى 10 ميلليونداي-اۋ (ءاربىر مۇعالىم ءۇشىن 133333 تەڭگە - اۆت.) دەيمىن. ءيا، 10 ميلليون. سول اقشاعا كومپانيا ءبىزدىڭ مۇعالىمدەرىمىزدى اعىلشىن تىلىنە ۇيرەتەدى»، - دەدى ز. ماقسۇتوۆا. ايتا كەتەيىك، بۇعان دەيىن بۇقارالىق اقپارات قۇرالدارىندا تاراعان مالىمەتكە سايكەس، جالپى قازاقستاندا ءۇشتىلدى ءبىلىم بەرۋ جۇيەسىن ەنگىزۋگە 1,4 ميلليارد جۇمسالادى. اتالعان قارجىنىڭ باسىم بولىگى - 1 تريلليون 153 ميلليارد تەڭگەسى بيۋدجەتتەن بولىنەدى.

اۆتور: ارمان اسقاروۆ