جۇمىس توبى ب ا ق ماسەلەسىنە ارنالعان زاڭ جوباسىنىڭ نەگىزگى ەرەجەلەرىن تالقىلادى
توپتىڭ جۇمىسىنا پارلامەنت دەپۋتاتتارى، مەملەكەتتىك ورگانداردىڭ، ۇكىمەتتىك ەمەس ۇيىمداردىڭ، بۇقارالىق اقپارات قۇرالدارىنىڭ جانە قوعامداستىقتىڭ وكىلدەرى قاتىستى، دەپ حابارلايدى قازاقپارات اقپارات جانە كوممۋنيكاتسيالار مينيسترلىگىنىڭ باسپا ءسوز قىزمەتىنە سىلتەمە جاساپ.
ەسكە سالا كەتەيىك، زاڭ جوباسىنا بايلانىستى جۇمىس توبىنىڭ قۇرامى 1- قاراشادا بەكىتىلىپ، جوبا مينيسترلىكتىڭ رەسمي سايتىنا ورنالاستىرىلعان بولاتىن. العاشقى وتىرىستا جۇمىس توبى زاڭ جوباسىنىڭ نەگىزگى ەرەجەلەرىن تالقىلادى. جيىندى اشقان اقپارات جانە كوممۋنيكاتسيالار ءمينيسترى داۋرەن ابايەۆ زاڭ جوباسىن ازىرلەۋ بارىسىندا بارلىق مۇددەلى تۇلعالاردىڭ قاتىسۋىن، تالقىلاۋدىڭ اشىقتىعى مەن قولجەتىمدىگىن قامتاماسىز ەتۋ ماقساتى كوزدەلگەنىن اتاپ ءوتتى.
مينيستر سونىمەن بىرگە، اقپارات، بايلانىس جانە اقپاراتتاندىرۋ سالاسى بۇگىندە شىن مانىندە، جاھاندىق دەڭگەيدە بولىپ جاتقان تەحنولوگيالىق جانە قوعامدىق قايتا قۇرىلۋ اۆانگاردىندا اۋقىمدى وزگەرىستەرگە ۇشىراپ جاتقانىن ايتتى. د. ابايەۆ قوعام تالقىسىنا شىعارىلعان زاڭ جوباسى مينيسترلىكتىڭ ۇستانىمى بويىنشا قازىرگى كەزەڭدە تالاپ ەتەتىن وزگەرىستەردىڭ كورىنىسى بولىپ تابىلاتىنىن اتاپ ءوتىپ، وتىرىسقا بەلسەندى قاتىسقان جۇمىس توبىنىڭ بارلىق مۇشەلەرىنە ريزاشىلىعىن ءبىلدىردى.
باس قوسۋدا سونداي-اق اقپارات جانە كوممۋنيكاتسيالار ۆيتسە-ءمينيسترى ا. اجىبايەۆ پەن جۇمىس توبىنىڭ باسقا دا مۇشەلەرى ءسوز سويلەدى. وتىرىستا ايتىلعان بارلىق ۇسىنىستار مينيسترلىك تاراپىنان ەسكەرىلىپ، ودان ءارى جۇمىستا پايدالانىلاتىن بولادى. زاڭ جوباسىنىڭ ماقساتى بۇقارالىق كوممۋنيكاتسيانىڭ تەحنولوگيالارىن دامىتۋعا سايكەس ب ا ق، تەلەراديو حابارلارىن تاراتۋ، اقپاراتتاندىرۋ جانە بايلانىس سالاسىندا قوعامدىق قاتىناستاردى قۇقىقتىق رەتتەۋ بولىپ تابىلادى. قۇجاتتا 200 گە جۋىق تۇزەتۋلەر قامتىلعان جانە 4 كودەكس پەن 12 زاڭعا وزگەرىستەر مەن تولىقتىرۋلار ەنگىزۋ كوزدەلەدى. جۇمىس توبىنىڭ قۇرامىنا 60 قا جۋىق ادام كىردى.
اۆتور: قانات مامەتقازى ۇلى
