ايگىلى «مۇزارت» توبى ەش جەردە جاريا ەتىلمەگەن قۇپيالارىمەن ءبولىستى

استانا. قازاقپارات - اتى اڭىزعا اينالعان «مۇزارت» توبىنىڭ جىگىتتەرى جەكە ومىرلەرى جايىندا سىر شەرتىپ، بۇگىندە ۇل-قىزدارىن تاربيەلەپ وتىرعان جارلارىمەن قالاي تانىسقاندارىن ايتىپ بەردى.

بۇل تۋرالى ءلايليا سۇلتان قىزىنىڭ «ايەل باقىتى» باعدارلاماسىندا ايتىلدى.

توپتىڭ ۇلكەنى ساكەن مايعازيەۆ «مۇزارت» قۇرىلماي تۇرعاندا-اق شاڭىراق كوتەرگەنىن ايتتى. «دينارانىڭ الدىمەن كوزىنە، ودان كەيىن وزىنە عاشىق بولدىم» دەيدى ساكەن. مەيرامبەككە كەزەك جەتكەن كەزدە ول «ۇيلەنگەنگە دەيىن قانشا رەت عاشىق بولعانىڭدى ايت» دەپ قالجىڭدادى. سوندا مەيرامبەك بەسپايەۆ:

«قانشا رەت ەكەنىن بىلمەيمىن. ءبىراق مارحابباتقا ەس-ءتۇسسىز عاشىق بولدىم. 2004-جىلى. ونى كورگەن كەزدە ۇيلەنۋ كەرەك ەكەنىن ءتۇسىندىم. ول كەزدە مارحاببات 18 گە تولماعان ەدى. سول سەبەپتى اكە-شەشەسى رۇقسات بەرمەي، ءبىراز كۇتۋگە تۋرا كەلدى. باسىندا ءارتىس دەدى. دەگەنمەن دۇرىس جىگىت ەكەنىمە كوزدەرى جەتكەننەن كەيىن ۇيلەندىك. مەن ول كەزدە 28 دە بولدىم. ءبىرىنشى تۇرىنە، سودان كەيىن ارالاسا كەلە جان-دۇنيەسىنە، قاراپايىمدىلىعىنا عاشىق بولدىم»، - دەپ جاۋاپ بەردى.

بۇگىندە ءبىر قىز، ءبىر ۇلدى تاربيەلەپ وتىرعان مەيرامبەك كوپبالالى اكە بولۋدى ارماندايتىنىن ايتتى.

«قۇدايعا شۇكىر، ءبىر قىزىم. ءبىر ۇلىم بار. كىم كوپ بالالى بولعىسى كەلمەيدى؟ بىلمەيمىن، ونداي ادامداردى تۇسىنبەيمىن، ءبىز دە ارماندايمىز. مەن نەگىزى اتام مەن اپامنىڭ قولىندا وسكەنمىن. وندا 10 بالا بار. سول كىسىلەردىڭ بالاسى بولعاندىقتان اكە-شەشەمنىڭ بار ەكەنىن وسكەننەن كەيىن ءبىر-اق ءبىلدىم. مەنەن كەيىن ەكى قارىنداسىم بار. وكىنىشكە وراي، مەن ءۇشبالالى وتباسىدان شىقتىم. ءبىراق كاۋساردىڭ، ابۋحايىردىڭ ءىنى-قارىنداستارى كوپ بولسا ەكەن دەپ ارماندايمىن»، - دەدى «مۇزارت» توبىنىڭ سەرىسى.

توپتىڭ كەنجەسى جۇبايى ءجاميليانى اسا باعالايتىنىن ايتتى.

«مەن 26 جاسىمدا ۇيلەندىم. جۇبايىم ءوزىنىڭ يناباتتىلىعىمەن، سىپايىلىعىمەن قاراپايىمدىلىعىمەن وزىنە تارتىپ الدى. ەشقانداي وكىنبەيمىز. اللاعا شۇكىر، جولعا شىققان كەزدە ءبىزدىڭ تىلەۋىمىزدى تىلەپ، ساپاردان كەلگەن كەزدە جىلى شىرايمەن قارسى الىپ جاتادى»، - دەدى كەنجەبەك ءجانابىلوۆ.

باعدارلاماعا قوناق رەتىندە تانىمال ءانشى، مەيرامبەكپەن بىرگە «عاشىق جۇرەك» فيلمىندە باستى ءرولدى سومداعان ءمولدىر اۋەلبەكوۆا قاتىستى. ول مەيرامبەك اعاسىنىڭ اكتەرلىك شەبەرلىگى تۋرالى ءسوز ەتتى.

«كينو الەمى دەگەن قىزىق قوي. ودان بەرى دە 6 جىل وتە شىعىپتى. ابدەن «اعا، اعا» دەپ وسكەننەن كەيىن ىڭعايسىز بولدى. ول جەردە مەيرامبەك پەن ءمولدىردىڭ اراسىندا ماحاببات سەزىمىن كورسەتۋ قيىنعا سوقتى. مىسالى، مەيرامبەك اعا تەكپەشەكپەن جۇگىرىپ بارا جاتىپ «ءمولدىر، توقتاشى» دەگەن كەزدە كۇلكىم كەلدى. ءىرى پلانمەن كورسەتەتىن بولسا، مەن ول جەردە نەگىزى كۇلىپ جۇگىرىپ بارا جاتىرمىن. عاشىق كوزبەن قاراۋ قيىن بولدى. اكتەرلىك قابىلەتىنە، انشىلىگىنە ءسوز جوق»، - دەپ اتاپ ءوتتى اۋەلبەكوۆا.

باعدارلاما بارىسىندا «مۇزارت» توبى ەش جەردە جاريا ەتپەگەن جاڭالىعىمەن ءبولىستى. توپ تاعى دا ءبىر رەت 15 جىلدىق مەرەيتويىن اتاپ وتپەك. 27- قاراشا كۇنى الماتىداعى رەسپۋبليكا سارايىندا «مۇزارت» توبىنىڭ كونسەرتى وتەدى.