قازاقستاندا بۇركىتشىلەردىڭ حالىقارالىق تۋرنيرى وتەدى
بەلگىلى بولعانداي، تۋرنيردىڭ العاشقى كۇنى بۇركىتتى قولعا شاقىرۋ، ەركىن ۇشىرۋ جانە شىرعاعا سالۋ سياقتى سايىستار بولادى. ال، سوڭعى كۇنى بۇركىتتى قويانعا، تۇلكىگە سالۋ سىندى اڭشىلىقتىڭ ەڭ قىزىقتى ساتتەرىنە كەزەك بەرىلمەك. «كوزى تىرىسىندە باپتاپ سالعان قىرانى تاعى اڭنان تايسالماعان قۇسبەگى كۇنتۋعان اقساقالدى ەسكە تۇسىرۋگە ارنالعان تۋرنير بيىل ەكىنشى مارتە ۇيىمداستىرىلىپ وتىر. بۇل جارىس العاشقى جىلى رەسپۋبليكا كولەمىندە وتسە، بيىلعى جىلى حالىقارالىق تۋرنير دەڭگەيىنە قادام باستى.
ق ر ۇلتتىق سپورت تۇرلەرى قاۋىمداستىعى ۇيىمداستىرعان بۇل تۋرنيرگە بيىل كورشىلەس موڭعوليا جانە قىرعىزستان ەلدەرىنىڭ بۇركىتشىلەرى مەن ەلىمىزدىڭ بارلىق وبلىستارىنىڭ قۇسبەگىلەرى قاتىسادى دەپ كۇتىلۋدە. جارىس وتكىزىلەتىن جەر - استانادان قوياندى اۋىلى باعىتىنا شىعاتىن «سوفيەۆكا تاس جولىنىڭ» بويى»، - دەپ اتاپ وتىلگەن ق ر ۇلتتىق سپورت تۇرلەرى قاۋىمداستىعى باسپا ءسوز قىزمەتىنىڭ مالىمەتىندە.
ەسكە سالىپ وتسەك، كۇنتۋعان توقتىباي ۇلى اتىنداعى بۇركىتشىلەردىڭ العاشقى جىلعى تۋرنيرىندە ەلىمىزدىڭ توعىز وبلىسىنىڭ قۇسبەگىلەرى باق سىناعان. بۇركىتتەرى بابىندا بولىپ، باقتارى جانعان تاراز قۇسبەگىلەرى باس جۇلدەنى جەڭىپ العان ەدى. ەكىنشى ورىن استانا بۇركىتشىلەرىنە، ءۇشىنشى ورىن پاۆلودار وبلىسىنىڭ قۇسبەگىلەرىنە بۇيىرعان بولاتىن.
