اقجارقىن تۇرلىبايدىڭ سوت وتىرىسى قورىتىندىسىنان ادۆوكاتتار جىگەرلەنە ءتۇستى
بۇگىن ق ح ر گۋاڭدۇڭ پروۆينتسياسى گۋڭجوۋ قالاسىنىڭ ءبىرىنشى ساتىداعى سوتىندا ق ر ازاماتشاسى اقجارقىن تۇرلىبايعا قاتىستى سوت وتىرىسىنىڭ قورىتىندىسىنان جىگەرلەنە ءتۇستى، دەپ حابارلايدى قازاقپاراتتىڭ قىتايداعى مەنشىكتى ءتىلشىسى.
«سوت وتىرىسى ءساتتى ءوتتى. قورىتىندىسى دا ءوزىمىز كۇتكەندەي بولىپ شىقتى. بۇل جولى ءبىز پيتەر ەسىمدى افريكالىق جىگىت پەن الەنا ەسىمدى (نيگەريالىقتىڭ جۇبايى - رەد.) قىزدىڭ كىنالى ەكەنىن ايعاقتايتىن فاكتىلەردى كەلتىردىك. وسىلايشا، ءبىز اقجارقىننىڭ كىناسىزدىگىن دالەلدەۋگە نيەتتىمىز. قازىر ناعىز قىلمىسكەرلەر بوستاندىقتا ءجۇر، ال ولارعا الدانعان ادام جاۋاپكەرشىلىكتىڭ بار سالماعىن كوتەرۋدە. بۇگىنگە دەيىن بىرنەشە سوت وتىرىستارى ءوتتى، ناتيجەسىن بۇگىن كورىپ وتىرمىز»، - دەدى قازاقستاندىقتىڭ باستى قورعاۋشىسى - ادۆوكات فەن چجيتسزيان. ول سوتتىڭ ءادىل شەشىم قابىلدارىنا سەنىمدى ەكەنىن جانە قىزدىڭ بولاشاعى جارقىن ەكەنىن ايتتى.
«مەنىڭ كوپجىلدىق زاڭگەرلىك تاجىريبەم بويىنشا، تەز قابىلدانعان شەشىمدەر سوتتالۋشى پايداسىنا شەشىلمەيدى. ءبىراق سوندا دا ءبىز كەزەكتى سوت وتىرىسى مەن سوت شەشىمىنىڭ 2017-جىلى قاڭتار ايىندا شىعاتىنىنا ۇمىتتەنەمىز. بۇل ءبىز ءۇشىن ۇلكەن جەتىستىك بولار ەدى»، - دەدى فەن چجيتسزيان.
قازاقپارات تىلشىسىنە بەرگەن سۇحباتىندا قىزدىڭ قازاقستاندىق ادۆوكاتى سۇڭقار نۇرماعامبەتوۆ وتىرىس تۋرالى قىسقاشا ايتىپ ءوتتى. «بۇگىن گۋاڭجوۋ سوتىندا ءبىزدىڭ وتانداسىمىز اقجارقىن تۇرلىبايدى ەسىرتكى كونترابانداسىنا ايىپتاۋ بويىنشا سوت وتىرىسى ءوتتى. ودان جاۋاپ الىندى جانە ول قىتاي تىلىندە تۇسىنىكتەمە بەردى. اقجارقىن ايىپتاۋلارمەن كەلىسپەيدى جانە ءوزىنىڭ كىناسىز ەكەنىن ايتۋدا. سوت كەڭەس بولمەسىنە كەتتى جانە جاريالاۋ مەرزىمى اشىق كۇيىندە قالدى. ۇكىم شىعارۋ مەرزىمى جاريالانعاندا، تاراپتارعا ءتيىستى تۇردە حابار بەرىلەدى»، - دەدى ادۆوكات قازاقپارات تىلشىسىنە بەرگەن سۇحباتتا.
ونىڭ ايتۋىنشا، اقجارقىننىڭ كوڭىل-كۇيى قاناعاتتانارلىق. «اقجارقىن ەكەۋمىز سويلەستىك. وعان تۋىستارىنىڭ فوتوسۋرەتتەرى مەن اۋديوجازبالارىن كورسەتىپ، قولداۋ بىلدىردىك. ءوز كەزەگىندە اقجارقىن وقيعاعا بەي-جاي قاراماعان قازاقستان ازاماتتارىنا، ق ر س ءى م، قورعاۋشىلارعا العىس ءبىلدىرىپ، قولداۋ كورسەتۋلەرىن سۇرادى»، - دەپ س. نۇرماعامبەتوۆ ەرەكشە اتاپ ءوتتى. ق ح ر- داعى ق ر ەلشىلىگىنىڭ كونسۋلدىق ءبولىمىنىڭ جەتەكشىسى بولات سىرلىبايەۆتىڭ ايتۋىنشا، اقجارقىن تۇرلىبايدىڭ جانە وزگە دە ق ر ازاماتتارىنىڭ قۇقىقتارى مەن مۇددەلەرىن قورعاۋ ماسەلەسىن قازاقستان سىرتقى ىستەر مينيسترلىگى مەن ق ح ر- داعى ق ر ەلشىلىگى ءجىتى قاداعالاپ وتىرادى. ول 2015-جىلى قىركۇيەك ايىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ ق ح ر مەملەكەتتىك ساپارى بارىسىندا ەكى ەل اراسىنداعى سوتتالعان ادامداردى بەرۋ تۋرالى كەلىسىم بويىنشا راتيفيكاتسيالانعان گراموتا الماسۋ تۋرالى حاتتاماعا قول قويىلعانىن ەسكە سالدى. 2015-جىلدىڭ تامىز ايىنان بەرى ق ح ر- داعى ق ر ەلشىلىگى مەن قازاقستان قۇقىق قورعاۋ ورگاندارىنىڭ كومەگىمەن قىتايدا سوتتالعان 12 قازاقستاندىق ەلگە قايتارىلدى. «اقجارقىندى ەكستراديتسيالاۋ ءۇشىن سوتتىڭ شەشىمى شىعۋى قاجەت. ونسىز ءبىز اقجارقىندى ەلگە قايتارا المايمىز. ءبىز قىتاي سوتى ءادىل شەشىم شىعارادى دەپ ۇمىتتەنەمىز»، - دەدى ب. سىرلىبايەۆ.
