قازاقستاندا سينتەتيكالىق ەسىرتكىنى تۇتىنۋ ۇلعايادى دەپ بولجانۋدا

استانا. قازاقپارات - ىشكى ىستەر مينيسترلىگى قازاقستاندا سينتەتيكالىق ەسىرتكىنى(حيميالىق قوسىمشالار ارقىلى جاسالعان) تۇتىنۋ كولەمى ۇلعايادى دەپ بولجاپ وتىر، دەپ حابارلايدى قازاقپارات.

«گەروين جەتكىزۋ كولەمى كەمىگەن كەزدە، ەسىرتكى پايدالانۋشىلار ناشانىڭ وزگە تۇرلەرىن ىزدەي باستايدى. سوندىقتان ءبىزدىڭ بولجام بويىنشا، سينتەتيكالىق ەسىرتكىنى پايدالانۋ كولەمى ارتا ءتۇسۋى ىقتيمال. ول قازىردىڭ وزىندە بايقالا باستادى. ەلگە سينتەتيكالىق ەسىرتكىلەردىڭ ۇلكەن اعىنى تۇسە باستادى»، - دەيدى استانادا وتكەن ۇ ق ش ۇ ەلدەرىنىڭ زاڭسىز ەسىرتكى اينالىمىنا قارسى كۇرەس ورگاندارىنىڭ ۇيلەستىرۋشى كەڭەسىنىڭ 18-وتىرىسىندا ءى ءى م ەسىرتكى بيزنەسىنە جانە ەسىرتكى اينالىمىنا قارسى كۇرەس دەپارتامەنتىنىڭ باسشىسى سۇلتان كۇسەتوۆ.

ءوز كەزەگىندە ق ر ىشكى ىستەر ءمينيسترى قالمۇحانبەت قاسىموۆ ەسىرتكى ساۋداسىنا قاتىستى نەگىزگى ماسەلەلەردى كوتەردى.

«ءبىرىنشىسى - ول اۋعان گەروينىن ءبىزدىڭ مەملەكەت ارقىلى رەسەيگە، ەۋروپاعا تاسىمالداۋ. ارينە، ول ناشانىڭ ءبىر بولىگى ءبىزدىڭ ەلدە قالىپ قويادى. مۇندا ءبىزدىڭ نەگىزگى باسىمدىق - گەروين كونترابانداسىنا توسقاۋىل قويۋ، ءىرى ەسىرتكى تاسىمالداۋشىلاردى، وسى سالادا قىزمەت ەتىپ جۇرگەن قىلمىستىق توپ ۇيىمدارىن انىقتاۋ. وسى سالادا بىرنەشە مەملەكەتتىك باعدارلامالار جۇزەگە اسىرىلدى. بيۋدجەتتىك قاراجاتتار نەگىزىنەن وڭتۇستىك شەكارا بەكەتتەرىن نىعايتۋعا، شەكارا قىزمەتتەرىنە، كەدەندىك ورگاندارعا جۇمسالدى»، - دەدى مينيستر.

«ەكىنشى - ماريحۋانا مەن گاشيشتى وندىرۋگە قاجەتتى شيكى ونىممەن قامتاماسىز ەتىپ وتىرعان جامبىل وبلىسىنداعى 140 گەكتار جابايى سورا القابى. سوندىقتان بۇل ايماقتا ارنايى ماقساتتاعى بولىمشەلەردىڭ، ارنايى كولىك جانە تىكۇشاق تەحنيكالارىنىڭ تارتىلۋىمەن اۋقىمدى جەدەل- الدىن الۋ شارالارى ءجيى ءوتىپ تۇرادى»، - دەدى ق. قاسىموۆ.

ءمينيستردىڭ اقپاراتى بويىنشا، قازاقستاندا ىشكى ىستەر ورگاندارى جىلىنا 3 مىڭنان استام ەسىرتكى قىلمىستارى انىقتايدى. شامامەن 30 توننا ەسىرتكى، سونىڭ ىشىندە 150 كەلى گەروين تاركىلەنەدى.

اۆتور: جاسۇلان جولدىبايەۆ