پلاستيكالىق وتا جاساتامىن دەپ كوز جۇمعان قىز- كەلىنشەكتەر - فوتو
NUR. KZ پورتالى پلاستيكالىق حيرۋرگيانىڭ قۇربانى بولعان 10 ادام تۋرالى ofigenno.com سايتىنا سىلتەمە جاساپ حابارلايدى.
بۇل ارۋلار بەت- ءجۇزىن ادەمىلەيمىز دەپ ومىرىمەن قوش ايتىسقاندار.
يۋليا، 18 جاستا، رينوپلاستيكا
لۆوۆ تۇرعىنى يۋليا ءوز مۇرنىنىڭ ءپىشىنىن ۇناتپاي، رينوپلاستيكا جاساتۋعا بەل بۋادى. ول كوپ ويلانىپ، سول قالاداعى كوسمەتولوگيالىق اۋرۋحاناداعى ەڭ مىقتى دەگەن دارىگەرگە جۇگىنەدى.
وكىنىشكە وراي يۋليا دارىگەرلىك قاتەلىكتىڭ قۇربانى بولدى. وتا ءساتتى وتكەنىمەن، ناركوزدان كەيىن ونىڭ جۇرەگى توقتاپ قالعان. سويتسە، يۋليانىڭ وكپەسىنە تۇسكەن قان تىنىس جولدارىن جاۋىپ قالعان.
يۋليا كۋباريەۆا، 25 جاس، رينوپلاستيكا
بالا كەزىندە يۋليانىڭ مۇرىنىنا زاقىم كەلگەن، سوندىقتان ول مۇرنىنىڭ كەمشىلىكتەرىن جوندەۋ ءۇشىن رينوپلاستيكا جاساتپاق بولادى.
وتا ءساتتى وتسە دە، يۋليا ناركوزدان كەيىن ەسىن جيا الماعان. ول وتادان سوڭ 4 اپتا كومادا جاتىپ قايتىس بولدى. تەرگەۋ قىزمەتى وكپەنى جاساندى جەلدەتەتىن اپپاراتتىڭ ىستەن شىعۋىنان وتتەگى جەتىسپەي قالعانىن انىقتادى. بۇل ءوز كەزەگىندە ميدىڭ جۇمىسىن توقتاتقان.
لەيلا مۋرسالوۆا، 19 جاستا، رينوپلاستيكا
ءازىربايجاندىق لەيلا مۋرسالوۆا جۇرەك السىزدىگىمەن تۋعان. 19 جاسىندا تىنىس الۋعا كەدەرگى كەلتىرگەن مۇرىن قالقانىن تۇزەتۋ ماقساتىندا رينوپلاستيكاعا بارادى.
دارىگەرلەر ءوز جۇمىسىنا بەيقام قاراعان، ويتكەنى جۇرەك جەتىسپەۋشىلىگىمەن تۋعان قىزدى حيرۋرگيالىق وتا جاساتۋ تۋرالى رايىنان قايتارۋعا دا تىرىسپاعان. ناتيجەسىندە لەيلا وتا باستالماي جاتىپ قايتىس بولدى. كوپ مولشەردەگى اناستەتيكتەردىڭ دوزاسىن ءالسىز جۇرەك كوتەرە الماعان.
كسەنيا ميحايليۋتا، 25 جاستا، ءسۇت بەزىن ۇلكەيتۋ
زاپوروجە قالاسىنىڭ تۇرعىنى كسەنيانىڭ ءوز توسىنە كوڭىلى تولماي جۇرەتىن. ال وتا جاساتۋعا جىگىتى تاستاپ كەتكەن سوڭ بەل شەشتى.
دارىگەرلەردىڭ مالىمدەۋىنشە، وتا وتە جەڭىل وتكەن، الايدا ناركوز ەنگىزۋگە ارنالعان تۇتىكشەلەردى ورنالاستىرۋ كەزىندە پاتسيەنتتىڭ ءىرى قان تامىرىن كەسىپ كەتكەن. كسەنيا ىشىنە قان كەتىپ قايتىس بولدى.
كاتەرينا كاندو، 19 جاستا، ليپوساكسيا
كاتەرينا 2014 -جىلى ەكۆادورلىق ارۋلار بايقاۋىنىڭ جەڭىمپازى اتانعان. كوپتەگەن سىيلىقتاردىڭ ىشىندە وعان پلاستيكالىق حيرۋرگيا كلينيكاسىندا مەديتسينالىق قىزمەت كورسەتۋگە سەرتيفيكات بەرىلگەن.
باسىندا بۇل ارۋ سەرتيفيكاتتى باسقا بىرەۋگە سىيلاي سالامىن دەپ ويلاعان، ءبىراق بايقاۋ ۇيىمداستىرۋشىلارى، كلينيكا قىزمەتكەرلەرى ونى رايىنان قايتارىپ، ليپوساكتسيا جاساۋعا كوندىرگەن. ناتيجەسىندە بويجەتكەن ميدىڭ ءىسىنىپ كەتۋىنەن وتا ۇستىندە كوز جۇمدى.
پامەلا نيسمەنتو، 27 جاستا، ليپوساكسيا
بەلگىلى برازيليالىق مودەل ءبىر ەمەس بىرنەشە رەت پلاستيكالىق حيرۋرگتەردىڭ كومەگىنە جۇگىنگەن، كەزەكتى رەت وتا جاساتۋعا ەش قورىقپاستان بارعان ەدى. سول جىلى ول سان- پاۋلۋداعى ەڭ مىقتى كلينيكالاردىڭ بىرىندە تەرى استىنا جينالعان مايىن سىلىپ تاستاۋ ءۇشىن پىشاققا تۇسەدى.
وتا كەزىندە بويجەتكەننىڭ قان اينالىم جۇيەسى السىرەپ، گيپوۆولەميكالىق شوك الدى. الايدا باسپا سوزدە ونىڭ بۇيرەگىن تەسىپ جىبەردى دەگەن نۇسقا كوپ ايتىلدى.
اناستاسيا چاچينا، ليپوساكسيا
انا اتانعان ماسكەۋلىك اناستاسيا چاچينا ءوزىنىڭ ءمۇسىنىن تەز ارادا قالپىنا كەلتىرگىسى كەلدى. ليپوساكتسيا ەم- شاراسى ەكى ەتاپتان تۇردى. ءبىرىنشى ەتاپتا ءبارى ويداعىداي ءوتتى. ال ەكىنشىسىندە انەستەتيكتەردىڭ دوزاسى مولشەردەن كوپ بولعاندىقتان ول كوز جۇمدى.
ولگا ەمەليانوۆا، 31 جاستا، بلەفاروپلاستيكا
پەرم قالاسىنىڭ تۇرعىنى ءوز تويىنا از ۋاقىت قالعاندا قاباعىنا وتا جاساتپاق بولادى. ول تويدا ەڭ ادەمى قالىڭدىق بولعىسى كەلدى. الايدا جاسالعان وتا ونىڭ ءومىرىن قيدى. ليدوكاينگە اللەرگياسى بار بويجەتكەن وتا باستالماي جاتىپ قايتىس بولدى.
ولگا ەگوروۆا، 35 جاستا
ماسكەۋلىك ولگا ەگوروۆا جەلكەسىندەگى ارتىق مايدى الدىرتۋ ءۇشىن پىشاققا تۇسپەك بولادى. ءبىراق دارىگەرلەر ونىڭ ليدوكاينگە اللەرگياسى بارىن ەسكەرمەگەن. ناتيجەسىندە ولگا كوز جۇمادى.
ەكاتەرينا كلەمەنتيەۆا، 25 جاستا، ءسۇت بەزىن ۇلكەيتۋ
ەكاتەرينا كۇيەۋىنە توسىن سىي جاساماق بولىپ، قۇپيا تۇردە وتا ۇستەلىنە جاتادى. الايدا كەلىنشەك ليدوكاينىڭ ەكىنشى دوزاسىن كوتەرە الماي، اللەرگياسى ءورشىپ، قايتىس بولدى.
