يراك پرەمەرى انكارانى سوعىسقا ارانداتپاۋعا شاقىردى

استانا. قازاقپارات - يراك پرەمەر- ءمينيسترى حايدەر ابادي تۇركيا يراكپەن شەكاراسىنىڭ موسۋل قالاسىنا جاقىن تۇسىنا تانكتەر مەن ارتيللەريا ورنالاستىرىلعاننان سوڭ انكارانى سوعىسقا ارانداتپاۋعا شاقىردى.

  تەلەارناداعى باسپا ءسوز كونفەرەنسياسىندا ابادي باعدادتىڭ «تۇركيامەن سوعىسقىسى نەمەسە جانجالداسقىسى كەلمەيتىنىن»، ءبىراق اسكەرى وقيعانىڭ بۇلاي ءوربىپ كەتۋ مۇمكىندىگىنە دايىن ەكەنىن مالىمدەدى.

 ول باعدادتىڭ تۇركيالىق اسكەريلەرگە موسۋل ماڭىنداعى «يسلام مەملەكەتى» (ي م) ەكسترەميستىك ۇيىمىنىڭ سودىرلارىنا قارسى اسكەري وپەراتسيالارعا قاتىسۋىنا تىيىم سالعانىن دا ايتتى. اباديدىڭ سوزىنە قاراعاندا، ەگەر تۇركيا موسۋل ماڭىندا ۇرىسقا كىرىسسە، وندا يراك ونى «جاۋلاس ەل» قاتارىنا قوسادى.

تۇركيا 1 - قاراشادا وڭتۇستىك- شىعىستاعى يراكپەن شەكاراعا تانكتەر مەن ارتيللەرياسىن ورنالاستىرعان. انكارا اسكەرى «قاجەت بولعان جاعدايدا» يراكقا جونەلتىلۋى مۇمكىن ەكەنىن ايتقان. 1 - قاراشادا تۇركيانىڭ قورعانىس ءمينيسترى فيكري ىشىك انكارا شەكارانىڭ وزىنە تيەسىلى بولىگىندە اسكەري بولىمدەر ۇستاۋعا مىندەتتى ەمەسىن مالىمدەگەن. 25 - قازاندا تۇركيا سىرتقى ىستەر ءمينيسترى ميەۆلۋت چاۆۋشوگلۋ بيلىك ەگەر ەلدىڭ قاۋىپسىزدىگىنە قاتەر تونسە يراكتا قۇرلىقتاعى وپەراتسيالار باستاۋى مۇمكىن ەكەنىن حابارلاعان.

«ازاتتىق» جاڭالىقتارى