كۇلەكبايەۆتىڭ سىبايلاستارىنا قاتىستى ۇكىم شىقتى
الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ەرلان بولاتوۆ سوت ۇكىمىن وقىدى.
بۇعان دەيىن حابارلاعانىمىزداي، سۋديا كۇلەكبايەۆقا تەراكت جاساعانى ءۇشىن ءولىم جازاسىن تاعايىندادى. سونىمەن قاتار، ر. كۇلەكبايەۆپەن بىرگە سوتقا اتىس قارۋىن زاڭسىز ساقتاپ، وزىمەن بىرگە الىپ ءجۇرىپ، دايىنداپ، ر. كۇلەكبايەۆپەن بىرگە كاسىپكەر مەشەرياكوۆتىڭ ۇيىنە قاراقشىلىق شابۋىل ۇيىمداستىرعان ر. ليۋ، ج. ساپاربەكوۆ، د. اسەمبەك ۇلى، ە. قۇسايىنوۆ، ن. ءابدىمومىندارعا قاتىستى سوت ۇكىمى وقىلدى.
سوت ۇكىمىمەن رافيك ليۋ ق ر ق ك 188-بابىنىڭ 4-بولىگى، 288-بابىنىڭ 1-بولىگى، 287-بابىنىڭ 4-بولىگىمەن كىنالى دەپ تانىلىپ، تۇپكىلىكتى جەكە مۇلكى تاركىلەنىپ، 9 جىل 6 ايعا باس بوستاندىعىنان ايىرىلدى. جازاسىن تۇزەۋ كولونياسىنىڭ قاتاڭ رەجىمىندە وتەۋ بەلگىلەندى.
جاسۇلان ساپاربەكوۆ ق ر ق ك 192-ب.4-ب؛ 287-ب، 4-ب كىنالى دەپ تانىلىپ، جەكە مۇلكى تاركىلەنىپ، تۇپكىلىكتى 10 جىل 6 ايعا باس بوستاندىعىنان ايىرۋ جانە جازانى تۇزەۋ كولونياسىنىڭ قاتاڭ رەجىمىندە وتەۋ تاعايىندالدى.
ەربول قۇسايىنوۆ ق ر ق ك 192-بابىنىڭ 4-بولىگى 2-تارماعى بويىنشا كىنالى دەپ تانىلىپ، جەكە مۇلكى تاركىلەنىپ، 10 جىلعا باس بوستاندىعىنان ايىرۋ جازاسى تاعايىندالدى. جازاسىن تۇزەۋ كولونياسىن قاتاڭ رەجىمىندە وتەيتىن بولادى.
داۋرەن اسەمبەك ۇلى ق ر ق ك 192-بابىنىڭ 4-بولىگى 2-تارماعى بويىنشا كىنالى دەپ تانىلىپ، جەكە مۇلكى تاركىلەنىپ، 10 جىل باس بوستاندىعىنان ايىرىلدى.
نۇرسۇلتان ءابدىمومىنعا ق ر ق ك 187-بابىنىڭ، 4-بولىگى بويىنشا كىنالى دەپ تانىلىپ، 3 جىلعا باس بوستاندىعىنان ايىرۋ جازاسى تاعايىندالدى. جازاسىن جالپى رەجىمدەگى كولونيادا وتەيدى. كەپىل رەتىندە الىنعان بۇلتارپاۋ شاراسى وزگەرىپ، سوت زالىنان قاماۋعا الىندى.
«كەپىل رەتىندە الىنعان مۇلىك زاڭدى يەلەرىنە قايتارىلسىن»، - دەدى ۇكىمدى وقىعان سۋديا ەرلان بولاتوۆ.
ايتا كەتەيىك، بۇگىن سۋديا ەرلان بولاتوۆ رۋسلان كۇلەكبايەۆقا قاتىستى سوت ۇكىمىن وقىدى.
«ر. كۇلەكبايەۆقا ق ر قىلمىستىق كودەكسىنىڭ (ق ر ق ك) 255-بابى، 4-بولىگى (لاڭكەستىك اكت)، 99-بابى، 2-بولىگى (ەكى نەمەسە ودان دا كوپ ادامدى ءولتىرۋ)، 24-بابىنىڭ 3-بولىگى (ءولتىرۋ ءۇشىن شابۋىل جاساۋ)، 192-ب. 4-ب. (توپ ادامعا قاراقشىلىق شابۋىل)، 287-ب. 4-ت. (زاڭسىز قارۋ تاسىمالداۋ)، 288-ب. 2-ب. (قارۋدى زاڭسىز جاساۋ)، 287 بابىنىڭ 4-بولىگىمەن، 291-ب. 4-ب. (قارۋ ۇرلاۋ)، 200-ب. 4-ب. (كولىك ۇرلاۋ)، 126-ب. 2-ب. (ادامدى زاڭسىز باس بوستاندىعىنان ايىرۋ) بويىنشا، 58-بابىنىڭ 4-بولىگىن باسشىلىققا الىپ، جەكە مۇلكى تاركىلەنىپ، ءولىم جازاسى تاعايىندالسىن»، - دەدى ۇكىمدى وقىعان سۋديا ەرلان بولاتوۆ.
اۆتور: الماس مۇقاش ۇلى
