اقجارقىن تۇرلىبايدى ەلگە قايتارۋعا بولادى - قازاقستاننىڭ قىتايداعى ەلشىسى

استانا. قازاقپارات - قازاقستاننىڭ قىتاي حالىق رەسپۋبليكاسىنداعى توتەنشە جانە وكىلەتتى ەلشىسى شاحرات نۇرىشەۆ ەسىرتكى كونترابانداسى ءۇشىن سوتتالعان اقجارقىن تۇرلىبايعا قاتىستى سوت شەشىمى وزگەرمەسە دە، ونى ەلگە قايتارۋعا بولادى دەپ سانايدى.

سەبەبى ونداي پراكتيكا بار، دەپ حابارلايدى قازاقپارات ءتىلشىسى.

شاحرات نۇرىشەۆتىڭ ايتۋىنشا، وتكەن جىلدان بەرى قىتايدا سوتتالعان ونداعان قازاقستان ازاماتى ەلگە قايتارىلدى. ولاردىڭ ىشىندە ءومىر باقي باس بوستاندىعىنان ايىرىلعاندار دا بار. قازىرگى كەزدە ولار جازالارىن ءوز جەرىندە وتەپ ءجۇر. ءدال وسى جولمەن ا. تۇرلىبايدى دا ەكستراديتسيالاۋعا بولادى.

«الايدا ونى ەكستراديتسيالاۋ ءۇشىن سوتتىڭ شەشىمى شىعۋى قاجەت. ونسىز ءبىز اقجارقىندى ەلگە قايتارا المايمىز. سوت شەشىمى شىققاننان كەيىن ءبىز ونى قازاقستانعا قايتارۋعا بار كۇش- جىگەرىمىزدى سالاتىن بولامىز. ونى ىستەي الامىز دەپ سەنەمىن. سەبەبى بىلتىردان بەرى ءبىز قىتايدا سوتتالعان 12 قازاقستاندىقتى ەلگە قايتاردىق»، - دەيدى ەلشى ش. نۇرىشەۆ.

ايتا كەتەيىك، بۇگىن قىتايدىڭ گۋاڭدۇڭ ولكەسىنىڭ گۋاڭجوۋ قالاسىندا ەسىرتكىنى زاڭسىز تاسىمالداعانى ءۇشىن سوتتالعان اقجارقىن تۇرلىبايدىڭ ءىسى بويىنشا سوت وتىرىسى باستالدى. وعان ەلشىلىكتىڭ كونسۋلدىق ءبولىمىنىڭ مەڭگەرۋشىسى قاتىسۋدا. ودان باسقا، اقجارقىن تۇرلىبايدىڭ قازاقستانداعى ادۆوكاتى، سونداي-اق قىتايدىڭ جەرگىلىكتى زاڭدارىن بىلەتىن قىتايلىق تاعى ءبىر ادۆوكاتى بار. ولاردىڭ بارلىعى اقجارقىندى قورعاۋعا اتسالىسىپ جاتىر.

بۇعان دەيىن سوت وسى ىسكە قاتىستى ءوز شەشىمىن شىعارىپ، ا. تۇرلىبايدى ءومىر باقي باس بوستاندىعىنان ايىردى. الايدا قازاقستاننىڭ سىرتقى ىستەر مينيسترلىگى، باس پروكۋراتۋرا مەن ەلشىلىكتىڭ ارالاسۋىمەن سول سوت شەشىمى قايتا قارالاتىن بولدى.

شاحرات نۇرىشەۆتىڭ سوزىنە قاراعاندا، جاقىندا تۋرا سونداي قىلمىسى ءۇشىن كورشىلەس ءبىر مەملەكەتتىڭ ازاماتى ءولىم جازاسىنا كەسىلدى.

اۆتور: ارمان اسقاروۆ