شىمكەنت، سايرام قالاشىقتارىن يۋنەسكو تىزىمىنە ەنگىزۋ ۇسىنىلدى

استانا. قازاقپارات - و ق و اكىمدىگىندە ءوڭىر باسشىسى جانسەيىت تۇيمەبايەۆ مادەنيەت سالاسى جانە زيالى قاۋىم وكىلدەرىمەن كەزدەستى، دەپ حابارلايدى قازاقپارات اكىمدىكتىڭ باسپا ءسوز قىزمەتىنە سىلتەمە جاساپ.

مادەنيەت سالاسىنداعى تۇيتكىلدى ماسەلەر قارالعان كەزدەسۋگە ايماقتىڭ بەلگىلى اقىن، جازۋشىلارى مەن عالىم، ارحەولوگتارى، سۋرەتشىلەر مەن قولونەر شەبەرلەرى، كومپوزيتورلار جانە مادەنيەت سالاسىنىڭ قىزمەتكەرلەرى قاتىستى.

باسقوسۋدىڭ باستى ماقساتى وبلىستىڭ مادەنيەتىن رەسپۋبليكالىق جانە حالىقارالىق دەڭگەيگە كوتەرۋ ەكەنىن ايتقان ايماق باسشىسى، وڭتۇستىك قازاقستان وبلىسىنىڭ رۋحاني كەلبەتى مەن بولمىسى، ونىڭ مادەنيەتىنەن، اتاپ ايتقاندا، ونەر، ادەبيەت، تەاتر مەن اقىندىق ونەر سىندى جاۋھارلاردان تۇراتىنىن، ونىڭ يەسى كەزدەسۋگە كەلگەن اتپال ازاماتتار ەكەنىن جەتكىزدى.

جيىندا وبلىستىق مادەنيەت باسقارماسىنىڭ باسشىسى نۇربولات احمەتجانوۆ سالادا جىل باسىنان بەرگى 9 ايدا اتقارىلعان جۇمىستاردى بايانداپ، ءبىرقاتار ۇسىنىستارىن جەتكىزدى.

اتاپ ايتقاندا، ەسەپتى مەرزىمدە وڭىردە قۇرىلىسى ءجۇرىپ جاتقان جاڭا نىساندار اياقتالىپ، سارىاعاش اۋدانىنداعى 5 اۋىلدىق مادەنيەت ءۇيى مەن كلۋب جانە شاردارا اۋداندىق مۋزەيىنىڭ جاڭا عيماراتى پايدالانۋعا بەرىلدى. وسى كەزەڭدە وبلىستاعى مادەنيەت جانە ونەر مەكەمەلەرىنە قاجەتتى 86 جاس ماماندارمەن قاتار، 23 مۇمكىندىگى شەكتەۋلى ازاماتتار جۇمىسقا قابىلدانعان.

«423 كىتاپحاناداعى كىتاپتار سانى 74 مىڭنان استام جاڭا كىتاپتارمەن تولىقتىرىلىپ، جالپى قور 7 ميلليون 185 مىڭ داناعا جەتتى، ەلەكتروندىق كىتاپ قورى 17355 دانانى قۇرادى. وقىرماندارعا قازىرگى زامان تالابىنا ساي ساپالى قىزمەت كورسەتۋ ءۇشىن «تاۋەلسىزدىكتىڭ 25 جىلدىعىنا - 25 مودەلدى اۋىلدىق كىتاپحانا» اتتى جوبانىڭ اياسىندا سوزاق، تۇلكىباس، ماقتارال اۋداندارىندا 7 مودەلدى اۋىلدىق كىتاپحانالار اشىلدى»، - دەدى باسقارما باسشىسى.

 كەزدەسۋ بارىسىندا وبلىسىمىزداعى اقىن- جازۋشىلار مەن پروفەسسور- عالىمدار جانە ارحەولوگتار تاريحي، رۋحاني مۇرالار جايىنداعى وزەكتى ماسەلەلەردى ورتاق تالقىعا سالىپ، ءبىرقاتار ۇسىنىستارىن جەتكىزدى. ماسەلەن، ولار ءوڭىردىڭ مادەنيەتىن كوتەرۋ ماقساتىندا ۇلتتىق يدەولوگيانى قالىپتاستىرىپ، قازاقتىڭ ءداستۇرلى ونەرىن دامىتۋ، تالانتتى جاستارعا قولداۋ كورسەتۋ ءۇشىن بارلىق اۋدان، قالالاردان اقىندار مەكتەبىن اشۋ ماسەلەسىن، وڭىرىمىزدە تاريح جانە مادەنيەت ءۇشىن ايرىقشا ماڭىزى زور ارحەولوگيالىق جانە ساۋلەت ەسكەرتكىشتەرىن قورعاۋ جانە شىمكەنت، سايرام قالاشىقتارىن يۋنەسكو- نىڭ تىزىمىنە ەنگىزۋ ماسەلەلەرىن تىلگە تيەك ەتتى.

 سونىمەن قاتار، وبلىستاعى مادەنيەت جانە ونەر مەكەمەلەرىنىڭ بۇگىنگى تاڭداعى جاي- كۇيى مەن وسى سالاداعى قالىپتاسقان پروبلەمالار جونىندە دە وبلىستىق تەاترلاردىڭ جەتەكشىلەرى ءوز ويلارىن ورتاعا سالدى.

ءوز كەزەگىندە، اكىم ءوڭىردىڭ تۋريزم سالاسى باعىتى بويىنشا ۇلكەن تۇجىرىمداما جاسالىنىپ جاتقانىن اتاپ ءوتىپ، تۋريستەرگە تۇركىستاننىڭ رۋحاني ورتالىق ەكەنىن كورسەتۋ قاجەتتىگىن ايتتى.

«بۇگىندە كيەلى تۇركىستانعا تۋريستەر كەلسە كەسەنەدەن باسقا باراتىن جەر جوق. ول تۋرالى دەرەكتەردى كوبىرەك ناسيحاتتاۋ ءۇشىن تۇركىستان قالاسىنان ياساۋيدىڭ جەكە مۇراجايى مەن ول تۋرالى كەيىنگى ۇرپاققا تەرەڭىرەك تانىتۋ ءۇشىن ياسساۋي مەكتەبىن ۇيىمداستىرۋدى ۇسىنامىن»، - دەدى وبلىس اكىمى.

زيالى قاۋىمنىڭ ۇلكەن ميسسياسى - ول حالىقتى رۋحاني جاعىنان بايىتۋ ەكەنىن ايتقان ايماق باسشىسى، سالت- ءداستۇر مەن بايىرعى ادەت- عۇرپىمىزدى، ۇلتتىق تاعامدارىمىز بەن قولونەرىمىزدى دامىتۋ قاجەتتىگىنە توقتالدى. وسى باعىتتاعى جۇمىستاردى جانداندىرۋ ماقساتىندا رۋحاني سالاداعى ءاربىر سالا ماماندارىنان وبلىس اكىمى جانىنداعى اقىلداستار القاسىن قۇرىپ، سول ازاماتتاردىڭ اقىل- كەڭەستەرىن تىڭداۋعا دايىن ەكەنىن جەتكىزدى.

كەزدەسۋ قورىتىندىسى بويىنشا ايتىلعان پىكىرلەر مەن ۇسىنىستار ەسكەرىلە وتىرىپ، مادەنيەت سالاسىنىڭ جۇمىسىن جاقسارتۋ بويىنشا وبلىس اكىمدىگىنىڭ حاتتاماسى تولتىرىلدى. بۇل رەتتە، وبلىس اكىمى ج. تۇيمەبايەۆ ءاربىر كوتەرىلگەن كەمشىلىكتەردىڭ ساپالى ءارى مەرزىمدى ورىندالۋى قاداعالاناتىنىن ەسكەرتتى.