قايرات ءمامي بولاشاق سۋديالاردىڭ پسيحولوگيالىق، مورالدىق- ەتيكالىق دايىندىعىن اتاپ ءوتتى

استانا. قازاقپارات - بۇگىن جوعارعى سوت ءتوراعاسى قايرات ءمامي سوت تورەلىگى اكادەمياسىنىڭ ماگيسترانتتارىمەن جانە پروفەسسورلىق- وقىتۋشىلىق قۇرامىمەن كەزدەستى.

ءىس- شارا جوعارعى سوت عيماراتىندا ءوتتى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

 ق. ءمامي سوت تورەلىگى اكادەمياسىنىڭ مەملەكەتتىك باسشىسىنىڭ تاپسىرماسى بويىنشا «100 ناقتى قادام: بارشاعا ارنالعان قازىرگى زامانعى مەملەكەت» ۇلت جوسپارىنىڭ 18-قادامىن ورىنداۋ ءۇشىن قۇرىلعانىن اتاپ ءوتتى. جوعارعى سوتتىڭ جانىنان اكادەميانىڭ قۇرىلۋى جانە جۇمىس ىستەۋى زاڭ ۇستەمدىگىن قامتاماسىز ەتۋدىڭ ماڭىزدى قادامدارىنىڭ ءبىرى رەتىندە ايقىندالعان. ونى قۇرۋ كەزىندە حالىقارالىق تاجىريبەلەر زەردەلەندى، ە ى د ۇ مەن ەۋروپا سۋديالارى حارتياسىنىڭ ۇسىنىمدارى، حالىقارالىق سۋديالار قاۋىمداستىعىنىڭ جانە ەۋروپا سۋديالارى كونسۋلتاتسيالىق كەڭەسىنىڭ قورىتىندىلارى نازارعا الىندى.

 جوعارعى سوت اكادەميامەن بىرلەسىپ بارلىق قاجەتتى نورماتيۆتىك قۇقىقتىق بازانى دايىندادى، پروفەسسورلىق- وقىتۋشىلىق قۇرامدى قالىپتاستىردى، قارجى جانە ماتەريالدىق- تەحنيكالىق قامتاماسىز ەتۋ ماسەلەلەردى شەشتى. بۇگىن اكادەميا ءوزىنىڭ الدىندا تۇرعان مىندەتتەردى شەشۋگە تولىعىمەن دايىن.

2016 -جىلعى ماگيسترانتتارعا ءسوزىن ارناي وتىرىپ، ق. ءمامي ولاردىڭ ءبارىنىڭ زاڭگەرلىك ماماندىق بويىنشا جەتكىلىكتى جۇمىس تاجىريبەسىنىڭ بارىنا جانە ءتۇسۋ ەمتيحاندارى بارىسىندا ءجىتى ىرىكتەۋدەن وتكەنىنە ەرەكشە توقتالدى. «جوعارعى سوت جانىنداعى سوت تورەلىگى اكادەمياسىنىڭ العاشقى، سوندىقتان ايرىقشا تۇلەكتەرى: سوت جۇيەسىن تىڭعىلىقتى تەورەتيكالىق دايىندىعى بار، بىلىمدەرىن ءىس جۇزىندە دۇرىس قولدانا الاتىن جاڭا فورماتسياداعى كادرلارمەن تولىقتىرۋعا ءتيىس. قازىردەن باستاپ ادىلدىككە قىزمەت ەتۋشىلەرگە جۇكتەلەتىن جاۋاپكەرشىلىكتى تەرەڭ سەزىنۋ قاجەت»، - دەدى جوعارعى سوتتىڭ ءتوراعاسى.

اكادەميانىڭ پروفەسسورلىق- وقىتۋشىلىق قۇرامىمەن كەزدەسۋ كەزىندە جاڭا فورماتسياداعى زاڭگەرلەر كادرلارىن دايارلاۋ ەلدىڭ يندۋستريالىق- يننوۆاتسيالىق دامۋىن قامتاماسىز ەتۋدىڭ جانە زياتكەرلىك الەۋەتىن ارتتىرۋدىڭ ماڭىزدى شارتتارىنىڭ ءبىرى بولىپ تابىلاتىنى ايتىلدى.

اكادەميانىڭ جاڭا مارتەبەدەگى نەگىزگى مىندەتى - سوت قىزمەتىنىڭ ەرەكشەلىگىن ەسكەرە وتىرىپ، وقۋ پروتسەسىن وزگەرتۋ بولىپ تابىلادى. بۇگىنگى كۇنى باسىمدىق اقپارات بەرۋدەن سۋديانىڭ كاسىبي بىلىكتىلىگىن قالىپتاستىرۋعا جاسالۋعا ءتيىس. ايرىقشا مارتەبەگە يە بولا وتىرىپ، اكادەميانىڭ ءوزى دەربەس ءبىلىم بەرۋ، عىلىمي جانە ادىستەمەلىك سالادا نەگىزگى ەرەجەلەردى ازىرلەپ، پراكتيكاعا ەنگىزۋگە، ماماندار دايىنداۋدىڭ جاڭا باعىتتارىن ايقىنداۋعا، ولاردى وقىتۋدىڭ مەرزىمى مەن نىساندارىن بەلگىلەۋگە قۇقىلى.

ق. ءمامي: «سوت تورەلىگىن جۇزەگە اسىرۋ ءۇشىن تىڭداۋشىنى پسيحولوگيالىق جانە مورالدىق- ەتيكالىق دايىنداۋ ماڭىزدى بولىپ تابىلادى. ءبىرىنشى كەزەكتە، وقۋ جوسپارلارى مەن باعدارلامالارى تىڭداۋشىلاردى قۇقىق قولدانۋعا ماشىقتاندىرۋعا ءتيىس»، - دەپ اتاپ ءوتتى.

 سۋديالىق كادرلاردى دايارلاۋ جانە قايتا دايارلاۋ ءۇشىن عىلىمي بازانى قامتاماسىز ەتە وتىرىپ، اكادەميانىڭ عىلىمي- زەرتتەۋ جۇمىسىنىڭ ناتيجەلەرىن وقۋ پروتسەسىنە ەنگىزۋ قاجەت.

اكادەميانى ودان ءارى دامىتۋ پەرسپەكتيۆاسى سوت ءبىلىمىنىڭ 2017-2020 -جىلدارعا ارنالعان ستراتەگياسىنىڭ جوباسىندا كوزدەلگەن. قازىرگى كەزدە ول تالقىلاۋ جانە پىسىقتاۋ كەزەڭىنەن وتۋدە.

باسشىلىق پەن پروفەسسورلىق- وقىتۋشىلىق قۇرامنىڭ الدىنا وقۋ جانە عىلىمي- زەرتتەۋ پروتسەستەردى دامىتۋ بويىنشا ءبىرقاتار مىندەتتەر قويىلدى، سونىمەن قاتار وقۋ ورنىن ودان ءارى جاڭعىرتۋدىڭ باعدارى ايقىندالدى.