الماتى وبلىسىندا مال ساتۋعا شىققان اعايىندىلاردىڭ ولىمىنە قاتىسى بار تاعى ءبىر كۇدىكتى ۇستالدى
ۇڭگىرتاس اۋىلىنىڭ تۇرعىنى باقىت بايقاسىموۆ مارقۇمداردىڭ قالاي ولتىرىلگەنىن كورگەن. جىگىت، ءتىپتى، ءالى ءتىرى جاتقان ازاماتتاردىڭ بىرىنە اراشا تۇسپەك تە بولىپتى. ءبىراق قورىقتىم دەگەن جەلەۋمەن كەيىن پوليتسياعا حابارلاماعان. ءتارتىپ ساقشىلارى دا ونى سىبايلاس رەتىندە ۇستاعانىمەن، كەيىن قولحاتپەن بوساتىپ جىبەرگەن، - دەپ حابارلايدى ك ت ك تەلەارناسى.
ءۇش اعايىندىنىڭ ولىمىنە قاتىسى بار دەلىنگەن ءۇشىنشى كۇدىكتى ۇڭگىرتاس اۋىلىنان. ەلدى مەكەن قىلعان ەكى كۇدىكتىنىڭ اۋىلدارىنا جاقىن ورنالاسقان. ۇرلىقتى مال ءبىراز كۇندەرى وسىندا ۇستالىپ ءجۇرىپتى. جانە ونىڭ بارلىعىن كورشى- قولاڭ كورگەن. ولار اۋىلداستارىنىڭ بۇل قىلمىسقا قاتىسى بارىنا ەش تاڭقالماي وتىر. ويتكەنى، باقىت بايقاسىموۆ بۇرىن دا ءىستى بولعان ەكەن.
باقىت بايقاسىموۆتى و باستا قامالعان ەكى كۇدىكتى بايقاۋسىزدا ۇستاپ بەرگەن ەكەن. باسىندا «تەك ەكەۋ بولدىق» دەگەندەر قاستارىندا تاعى تانىسىنىڭ جۇرگەنىن ايتىپ قالعان. ءۇشىنشى كۇدىكتى قاندى قىلمىس بولعان كەزدە تاۋدا مال باعىپ ءجۇرىپتى. «ءوزىنىڭ مالى ەمەس ول، ول - شابان(باقتاشى). بىرەۋدىڭ شابانى بولىپ جۇمىس ىستەيتىن. ول تابىلعان جۇمىستى ىستەدى دەسەك تە بولادى. ونىڭ ءۇيى دە جوق، كۇيى دە جوق. جالعىز ءوزى ايتەۋىر كۇن كورەدى، - دەيدى باقىت بايقاسىموۆتىڭ تۋىسى گۇلجان جۇرمانوۆا.
بۇل - سول ءۇشىنشى كۇدىكتى بايقاسىموۆتىڭ تۋىستارى. جەڭگەسىنىڭ ءوزى قاينىسىنىڭ كىسى ولىمىنە قاتىسى بار-جوعىن بىلمەيمىن دەپ باسىن الا قاشتى. ەسەسىنە كورشىلەرى جىگىتتىڭ ءجۇرىسى جايلى ايتىپ بەردى. ءۇش اعايىندىنىڭ ولىمىنە قاتىسى بار دەلىنگەن ءۇشىنشى كۇدىكتى اۋىلدا ۇنەمى شارۋاسىز، ءارى اراق ءىشىپ ءجۇرىپتى. «اۋىلدا جۇرگەندە اراق ىشەتىنىن كورەتىنبىز. كوپپەن بىرگە، جالعىز ءوزى دە ىشە بەرەدى»، - دەيدى ۇڭگىرتاس اۋىلىنىڭ تۇرعىنى ورىنكۇل باتىرحانوۆا.
باقىت بايقاسىموۆ مارقۇمداردىڭ قالاي ولتىرىلگەنىن كوزبەن كورگەن. ول بايقاۋسىزدا قىلمىستىڭ ۇستىنەن ءتۇسىپتى. جىگىت، ءتىپتى، ءالى ءتىرى جاتقان قادىلبەككە اراشا تۇسپەك تە بولعان ەكەن. ءبىراق ءوزىن دە قوسا اتىپ جىبەرە مە دەپ قورقىپ، قىلمىس تۋرالى جاق اشپاعان. پوليتسيا ونى سىبايلاس رەتىندە كۇدىككە العانىمەن، كەيىن قولحاتپەن جىبەرە سالعان. دەسە دە، مارقۇمداردىڭ تۋىستارى ونىڭ دا جازاعا تارتىلۋىن سۇراپ وتىر.
«باقىت قىلمىستىڭ ۇستىنەن تۇسكەن. مۇمكىندىگى بولا تۇرا مالىمدەگەن جوق. سوندىقتان ول دا سول قىلمىسقا قاتىسقان دەپ ەسەپتەيمىز. بۇل قىلمىستىڭ ىشىندە ءۇش اداممەن اقىرلاسۋى مۇمكىن ەمەس. ونى ۇيىمداستىرعان باسقا دا ادامدار بولۋى كەرەك»، - دەيدى مارقۇمداردىڭ تۋىسى ەركىن بەيسەكەي. كۇدىكتىلەردىڭ مايىتتەردى وسى اۋىل ارقىلى الىپ وتكەندىگى دە كۇدىك تۋدىرادى. قازىر تەرگەۋ اياقتالعان. ولارعا قاتىستى سوت وسى قاراشا ايىندا باستالادى دەپ كۇتىلۋدە.
