نازاربايەۆ «قازاق ەلى» كينو فيلمىنىڭ كورسەتىلىمىن تاماشالادى

استانا. قازاقپارات - مەملەكەت باسشىسى نۇرسۇلتان نازاربايەۆ «قازاق ەلى» كينو فيلمىنىڭ كورسەتىلىمىن تاماشالادى، - دەپ حابارلايدى اقوردانىڭ رەسىمي سايىتى.

ەلباسىنىڭ ءوزى يدەيا اۆتورى بولىپ سانالاتىن كينو ەپوپەيا مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاق فيلم» اكسيونەرلىك قوعامىنىڭ كينوستۋدياسىندا تۇسىرىلگەن.

قازاقستاندىق جاڭا تاريحي كينو تۋىندىعا قازاق ادەبيەتىنىڭ كلاسسيگى ءىلياس ەسەنبەرليننىڭ «كوشپەندىلەر» تريلوگياسىنىڭ ءبىرىنشى كىتابى - «الماس قىلىش» رومانى نەگىز بولعان. فيلمدەگى وقيعالار XV عاسىردا ءوربيدى. وعان جانىبەك پەن كەرەي حاندار تۇسىنداعى قازاق مەملەكەتتىلىگىنىڭ قالىپتاسۋى بارىسىنداعى باستى وقيعالار ارقاۋ بولادى.

كوپ سەريالى تەلەجوبا جۇمىسىنا رەسپۋبليكاداعى تانىمال كينوماتوگرافيستەر - قويۋشى رەجيسسەر رۇستەم ابدىراشەۆ، سەناريستەر سماعۇل ەلۋبايەۆ پەن تيمۋر جاقسىبەكوۆ اتسالىستى. جالپى، بۇل فيلمدى ءتۇسىرۋ جۇمىسىنا 500 ادام تارتىلعان.

ايتا كەتەيىك، «قازاق ەلى» تۋىندىسى تاياۋ ارادا جالپى ۇلتتىق پروكاتقا شىعارىلادى.