كەنتاۋدا «مەنىڭ اعاشىم مەنىمەن بىرگە وسەدى» اتتى تال ەگۋ شاراسى ۇيىمداستىرىلدى

استانا. قازاقپارات - وڭتۇستىك قازاقستان وبلىسى كەنتاۋ قالاسىندا ەل تاۋەلسىزدىگىنىڭ 25 جىلدىعىن مەرەكەلەۋ ءىس-شارالار جوسپارىنا سايكەس 1- سىنىپ وقۋشىلارىنىڭ تال ەگۋ شاراسى وتكىزىلدى، دەپ حابارلايدى قالا اكىمدىگىنىڭ باسپا ءسوز قىزمەتى.

ءىس-شاراعا قالا زيالىلارى، ۇستازدار مەن 1- سىنىپ وقۋشىلارى قاتىستى.

بيىلعى وقۋ جىلىندا قالاداعى 23 مەكتەپكە 1- سىنىپقا 2019 وقۋشى بارسا، وسىعان سايكەس، اكسيا اياسىندا، تيىسىنشە، 2019 ءتۇپ اعاش وتىرعىزىلدى. ونداعى ماقسات - جاستاردى پاتريوتتىق رۋحتا تاربيەلەۋ جانە تابيعاتتى ايالاۋعا باۋلۋ. سول سەبەپتى، ءبىرىنشى سىنىپتىڭ وقۋشىلارى مەكتەپتى بىتىرگەنشە وزدەرى ەككەن تالدارعا قارايتىن بولادى.