الەكسەي ني: پودوبەدوۆا سپورتتىق مانسابىن جالعاستىرۋى مۇمكىن
بۇل تۋرالى بۇگىن قازاقستاننىڭ اۋىر اتلەتيكادان باس جاتتىقتىرۋشىسى الەكسەي ني ءمالىم ەتتى، دەپ حابارلايدى، قازاقپارات.
ني ءوز سوزىندە زىلتەمىرشى قىزدارىمىزدىڭ سپورتتىق مانساپتارىن ودان ارى جالعاستىرۋ-جالعاستىرماۋى حالىقارالىق اۋىر اتلەتيكا فەدەراتسياسى قابىلدايتىن جازاعا بايلانىستى ەكەندىگىن اتاپ ءوتتى.
«ەگەر جارىستارعا قاتىسۋدان شەتتەتۋ مەرزىمى 2 جىل بولسا، وندا ولار ارى قاراي جالعاستىرادى. ال ەگەر 4 جىل بولسا، وندا سپورتتىق مانساپتارىن اياقتايدى. چينشانلو سپورتتىق مانسابىن ارى قاراي جالعاستىراتىندىعىن تاباندى تۇردە ايتۋدا. ويتكەنى، وعان جاسى مۇمكىندىك بەرەدى، قازىر ول نەبارى 23 تە. ال پودوبەدوۆا اۋەلدە «جوق» دەگەن بولاتىن. الايدا، ويلانا كەلە شەشىمدى (حالىقارالىق اۋىر اتلەتيكا فەدەراتسياسىنىڭ شەشىمى) كۇتەتىندىگىن ايتتى. ەگەر 2 جىل بولسا، وندا ول سپورتتىق مانسابىن جالعاستىرادى. ونىڭ جاسى قازىر 30 عا كەلگەنىمەن، الەۋەتتى وتە جوعارى سپورتشى»، - دەدى ني.
باس جاتتىقتىرۋشى سونىمەن قاتار مايا مانەزا سپورتتىق مانسابىن ودان ارى جالعاستىرماۋى مۇمكىن ەكەندىگىن اشىق ايتتى.
ايتا كەتەيىك، حالىقارالىق وليمپيادا كوميتەتى دوپينگ سىنامادا تىيىم سالىنعان زاتتار تابىلعان 2012-جىلعى وليمپيادا چەمپيوندارى سۆەتلانا پودوبەدوۆا، مايا مانەزا، زۋلفيا چينشانلونىڭ كورسەتكەن ناتيجەلەرىن جوققا شىعارعانىن رەسمي حابارلاعان بولاتىن.
ال كەشە وتاندىق بۇقارالىق اقپارات قۇرالدارى سۆەتلانا پودوبەدوۆانىڭ سپورتتىق مانسابىن اياقتاعاندىعىن جازعان ەدى.
«سپورتشى رەتىندە ەندى قايتىپ تۇعىرعا ورالمايمىن. مەن بۇل شەشىمدى ريوعا دەيىن، ول جاقتا قانداي ونەر كورسەتەتىنىمە قاراماستان، قابىلداعان بولاتىنمىن. بۇل مەنىڭ جەكە شەشىمىم»، - دەگەن ەدى سپورتشى.
