قىتايدا مىڭداعان قازاقستاندىق ۆيزالار كىمگە بەرىلدى؟

استانا. قازاقپارات - بۇگىنگى تاڭدا قىتايدىڭ بەيجىڭ قالاسىندا قازاقستان ەلشىلىگى، شاڭحاي مەن شياڭگاڭدا باس كونسۋلدىق، سونداي-اق ءۇرىمجى قالاسىندا پاسپورتتىق-ۆيزالىق قىزمەت جۇمىس ىستەيدى.

اتالعان نىسانداردىڭ بارلىعىندا قىتاي ازاماتتارىنا قازاقستاندىق ۆيزالار بەرىلەدى، دەپ حابارلايدى قازاقپارات ءتىلشىسى.

«بۇگىندە مىڭداعان قىتاي ازاماتتارى قازاقستانعا كەلىپ، وسى جەردە قالىپ قويادى دەگەن تۇسپالدار بار. سوندىقتان بەيجىڭ، شاڭحاي، شياڭگاڭ مەن ۇرىمجىدە بەرىلەگەن ۆيزالاردىڭ جالپى سانىن، ونىڭ كىمگە بەرىلەتىنىن بايانداپ بەرەيىن»، - دەدى قازاقستاننىڭ قىتايداعى توتەنشە جانە وكىلەتتى ەلشىسى شاحرات نۇرىشيەۆ بۇگىن استانادا وتكەن باسپا ءسوز ءماسليحاتىندا.

ونىڭ مالىمەتىنە سايكەس، وتكەن جىلى قىتاي حالىق رەسپۋبليكاسىنىڭ ازاماتتارىنا 118321 ۆيزا بەرىلدى. سونىڭ ىشىندە 83358 ۆيزانى، ياعني بارلىق رۇقسات قاعازدارىنىڭ 70 پايىزىن سول جەردە تۇراتىن قازاقتار الدى. قالعانى - جۇمىس، تۋريستىك جانە ءبىلىم الۋ ءۇشىن بەرىلەتىن ۆيزالار. «ال اعىمداعى جىلدىڭ توعىز ايى ىشىندە 86203 ۆيزا راسىمدەلدى. ونىڭ ىشىندە 58474 ۆيزا نەمەسە 68 پايىزى ەتنيكالىق قازاقتارعا بەرىلدى. 15 مىڭنان استامى - ىسكەرلىك ۆيزالار، 6 مىڭ جۇمىس ۆيزاسى، 5 مىڭ تۋريستىك، 299 وقۋعا، 322 قىزمەتتىك، 23 ينۆەستورلىق جانە 56 ترانزيتتىك ۆيزانى باسىپ بەردىك»، - دەپ اتاپ كورسەتتى ەلشى.

اۆتور: ارمان اسقاروۆ