قىتايدا اقجارقىن تۇرلىباي سياقتى ۇستالعان ءبىر ازامات اتۋ جازاسىنا كەسىلدى - ەلشى نۇرىشيەۆ

 استانا. قازاقپارات - بۇگىن سىرتقى ىستەر مينيسترلىگىندە وتكەن باسپا ءسوز ءماسليحاتىندا قازاقستاننىڭ قىتايداعى توتەنشە جانە وكىلەتتى ەلشىسى شاحرات نۇرىشيەۆ سول جاقتا سوتتالعان قازاقستاندىقتاردى قايتارۋ جۇمىسى بويىنشا بايانداپ، اقجارقىن تۇرلىبايدىڭ كەزەكتى سوتىنا توقتالدى.

ونىڭ سوزىنە قاراعاندا، قىتايدا وسى ىسپەتتى قىلمىس ءۇشىن سوتتالعان ءبىر شەتەل ازاماتىن اتۋ جازاسىنا كەستى. قازاقستان ونداي جازاعا جول بەرمەۋگە تىرىسادى، دەپ حابارلايدى قازاقپارات ءتىلشىسى.

ەلشىنىڭ ايتۋىنشا، وتكەن جىلى ەكى ەلدى اراسىندا سوتتالعان ازاماتتاردى قايتارۋ بويىنشا ارنايى حاتتاماعا قول قويىلعان بولاتىن. سونىڭ نەگىزىندە تامىز ايىنان باستاپ قىتايدا سوتتالعان 12 قازاقستان ازاماتى ەلگە قايتارىلىپ، جازالارىن ءوز جەرىندە وتەپ ءجۇر. " ءدال قازىر تاعى 12 ادامدى قايتارۋ بويىنشا ءتيىستى شارالار اتقارىلىپ جاتىر. ولار سان الۋان قىلمىستار ءۇشىن سوتتالعان. ىشىندە ءومىر باقي باس بوستاندىعىنان ايىرىلعاندار بار. بۇدان بولەك، ءۇش قازاقستاندىقتىڭ جازانى وتەۋ مەرزىمى 2016-2017 -جىلدارى اياقتالادى. سونداي- اق ءۇش ادام سوتتىڭ شەشىمىن وقشاۋلاعىشتا كۇتىپ ءجۇر. ولاردىڭ ىشىندە ەسىرتكى ساۋداسىنا قاتىسى بار دەگەن كۇدىكپەن ۇستالعان اقجارقىن تۇرلىباي دا بار"، - دەدى ش. نۇرىشيەۆ.

ەلشىنىڭ سوزىنە قاراعاندا، ەرتەڭ، قاراشانىڭ 2- كۇنى ا. تۇرلىباي بويىنشا كەزەكتى رەت سوت وتىرىسى وتەدى. "اقجارقىن تۇرلىباي بويىنشا ءبىر رەت سوت شەشىمىنىڭ شىققانىن جاقسى بىلەمىز. سول كەزدە ونى ءومىر باقي قىتايدىڭ تۇرمەسىنە وتىرعىزۋ شەشىمى شىعارىلعان بولاتىن. ءبىراق سىرتقى ىستەر مينيسترلىگىنىڭ جۇمىسى بار، باس پروكۋراتۋرانىڭ جۇمىسى بار، ەلشىلىكتىڭ جۇمىسى ارقاسىندا ءبىز سول سوت شەشىمىن قايتا قاراۋعا قول جەتكىزدىك. تۋرا سونداي قىلمىس ءۇشىن جاقىندا عانا ءبىزدىڭ كورشىلەس ءبىر مەملەكەتتىڭ ازاماتىن ءولىم جازاسىنا كەسكەن بولاتىن. ول كىسى اتىلىپ كەتتى.. .سوندىقتان ءبىز ءوز تاراپىمىزدان بار كۇش- جىگەرىمىزدى سالىپ، ءبىزدىڭ ءاربىر ازاماتىمىز ءۇشىن، ونىڭ تاعدىرى ءۇشىن، ءومىرى ءۇشىن كۇشىمىزدى اياماي، ەڭبەكتەنىپ، ولاردى قازاقستانعا قايتارۋعا بار كۇشىمىزدى سالۋدامىز"، - دەپ اتاپ كورسەتتى ش. نۇرىشيەۆ.