بەلگىلى عالىم قازاقستانعا ۋاحابيزمدى كىم اكەلگەنىن اشىپ ايتتى
بۇل تۋرالى «الماتى» تەلەارناسىنداعى «وتكىر ءتىل» باعدارلاماسىندا ايتىلدى.
عالىم الدىمەن ەلىمىزدىڭ مەشىتتەرىندە جۇرگىزىلەتىن ۋاعىزدارعا قاتىستى ويىن ايتادى.
«مۇنىڭ دۇرىس جاعى دا، بۇرىس جاعى دا بار. مەملەكەت جۇرگىزىپ وتىرعان ساياساتقا دەس بەرمەي جاتقاندار بار، سەبەبى. مىسالعا، مەن ۋاحابيستەردىڭ قالاي پايدا بولعانىن بىلەمىن»، - دەيدى ول.
ونىڭ ايتۋىنشا، ۋاحاببيزم اعىمىن قولداۋشىلار العاش تارازدا پايدا بولىپتى.
«اۋەلدە مەن مۇنىڭ نە ەكەنىن دە بىلمەدىم. كەيىن ىزدەندىم، تاريحىن زەرتتەدىم. سونىمەنەن، تازابەكتىڭ (بۇل ارادا مەكەمتاس اعا جۋرناليستەن «تازابەكتى بىلەسىڭ عوي؟» دەپ سۇراپ الدى) ۇيىندە 20 ۋاحابيسپەن بىرگە باس قوستىم. اڭگىمەلەرىن تىڭداي كەلە، ولارعا قارابەت بولمايىق دەدىم. ويلانىڭدار دەدىم. تازابەكتىڭ ۇيىندە وتىرعاندا، بۇل باعىتىنىڭ دۇرىس ەمەسىن، قاۋىپتى ەكەنىن ايتىپ، ساقتاندىردىم. تىڭدامادى... ءالى دە بولسا، وزدەرىنىڭ ارەكەتتەرىن جالعاستىرىپ جاتىر»، - دەدى مەكەمتاس اعا.
«سالافيتتەردى جويىپ جىبەرۋگە نە كەدەرگى؟» - دەيدى ءوز كەزەگىندە جۋرناليست.
«جويمايىنشا بولمايدى. جويماساق، ولار ءبىزدى جويادى. مەن تۇسىنبەيتىن ءبىر كەدەرگىلەر بار. ماسەلە، ءبىز كوزىن جويعىمىز كەلگەن سالافيتتەر بيلىكتىڭ ءوز ىشىندە دە وتىر. قىزىق، سوندا مەن بىلگەندى، ءتيىستى ورگاندار بىلمەي مە؟ بايتۇرسىنوۆ ايتقان، «ءدىنىن شانشىپ ىستىككە، اركىم ءبىر جەم ىزدەپ ءجۇر» دەپ. شىنىمدى ايتسام، ءوزىن ۋاحابي، سالافي دەگەندەردىڭ دىنگە قۇلاپ جاتقانىن كورگەم جوق. ولار اقشاعا قۇلاپ جاتىر. ونىڭ ورتالىعى ساۋد ارابياسى»، - دەيدى عالىم.
