ەلباسى نىسانداردى مەنشىككە بەرۋ ءىسىنىڭ جاريالىلىعىن قامتاماسىز ەتۋدىڭ قاجەتتىگىن اتاپ ءوتتى

استانا. قازاقپارات - مەملەكەت باسشىسى نۇرسۇلتان نازاربايەۆ قارجى ءمينيسترى باقىت سۇلتانوۆتى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.

كەزدەسۋ بارىسىندا ب. سۇلتانوۆ قازاقستان پرەزيدەنتىنە قارجى مينيسترلىگىنىڭ بيىلعى 9 ايدا اتقارعان جۇمىسىنىڭ قورىتىندىسى، رەسپۋبليكالىق جانە جەرگىلىكتى بيۋدجەتتىڭ اتقارىلۋى، سونداي-اق مەملەكەت باسشىسىنىڭ توراعالىعىمەن 2016-جىلعى 9- قىركۇيەكتە وتكەن ۇكىمەتتىڭ كەڭەيتىلگەن وتىرىسىنىڭ قورىتىندىسى بويىنشا بەرىلگەن تاپسىرمالاردىڭ ىسكە اسىرىلۋى تۋرالى باياندادى.

ەلباسى بيۋدجەت ۇدەرىستەرىنىڭ تيىمدىلىگىن ودان ءارى ارتتىرۋعا، بيۋدجەتتى قالىپتاستىرۋ بارىسىندا ەكونوميكانىڭ وسىمىنە ىقپال ەتەتىن مەملەكەتتىك باعدارلامالارعا نەگىزدەلگەن ۇتىمدى تاسىلدەردىڭ قولدانىلۋىنا باسا نازار اۋداردى.

سونداي-اق، قازاقستان پرەزيدەنتى جەكەشەلەندىرۋدىڭ ەكىنشى كەزەڭىن ىسكە اسىرۋ جونىندەگى شارالاردى جۇزەگە اسىرۋ قاجەتتىگىنە ايرىقشا توقتالدى.

- مەملەكەتتىك نىسانداردى وتاندىق جانە شەتەلدىك ينۆەستورلاردىڭ مەنشىگىنە بەرۋ ءىسىنىڭ مەيلىنشە جاريالىلىعى مەن تيىمدىلىگىن قامتاماسىز ەتۋ قاجەت، - دەدى نۇرسۇلتان نازاربايەۆ.

بۇدان بولەك، مەملەكەت باسشىسى مۇلىكتى زاڭداستىرۋ جونىندەگى ناۋقاننىڭ سوڭعى كەزەڭىنە قاتىستى مىندەتتەر قويدى. ماسەلەن، قازاقستان پرەزيدەنتى بۇل ناۋقاندى جۇرگىزۋ بارىسىندا قالىپتاستىرىلعان جاريالىلىق جاعدايىن اتاپ ءوتىپ، ونىڭ ەل ەكونوميكاسى ءۇشىن ناتيجەلىلىگىن ايتتى.

- مۇلىكتى زاڭداستىرۋ سالىق ەسەبىنەن بيۋدجەتتى تولىقتىرىپ، ودان ءارى ەكونوميكاعا پايداسىن تيگىزەتىن اكتيۆتەردى انىقتاۋعا مۇمكىندىك بەرەتىن بولادى. بۇل - سالىق جۇيەسىنىڭ باستى مىندەتتەرىنىڭ ءبىرى، - دەدى ەلباسى.

قارجى ءمينيسترى ءتيىمدى ەكونوميكالىق ساياسات پەن «نۇرلى جول» مەملەكەتتىك باعدارلاماسىن ىسكە اسىرۋ بارىسىندا زاڭنامالارعا وزگەرىستەر ەنگىزۋ، سالىق پەن كەدەندىك باسقارۋدى جەتىلدىرۋ ەسەبىنەن بيۋدجەت كىرىسىنىڭ تۇراقتانۋى جانە بيىل ونىڭ %7,4  عا ءوسۋى بايقالىپ وتىرعانىن مالىمدەدى.

كەزدەسۋ قورىتىندىسى بويىنشا ەلباسى ءبىرقاتار ناقتى تاپسىرما بەردى.