قازاقستاندا ءبىرقاتار كەن ورىندارىنىڭ قورلارى ەسەلەپ ارتتى

استانا. قازاقپارات - سوڭعى ون جىلدان ەلىمىزگە تارتىلعان ينۆەستيتسيانىڭ جارتىسىنان استامى تاۋ- كەن جانە مۇناي- گاز سەكتورىنا باعىتتالدى.

 بۇل تۋرالى بۇگىن ۇكىمەت وتىرىسىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ءمالىم ەتتى.

 «سوڭعى 10 جىلدا ەلىمىزگە 230 ميلليارد ا ق ش دوللارىنان استام ينۆەستيتسيا تارتىلدى. ونىڭ 60 پايىزدان استامى، ياعني 132,6 ميلليارد دوللارى تاۋ- كەن جانە مۇناي- گاز سەكتورىنا باعىتتالدى»، - دەدى مينيستر.

 ونىڭ سوزىنە قاراعاندا، ەلىمىزدىڭ قازىرگى گەولوگيالىق الەۋەتى نەگىزىنەن كەڭەستىك كەزەڭدە پەرسپەكتيۆالى اۋماقتارداعى جۇيەلى تۇردە گەولوگيالىق زەرتتەۋلەردىڭ ارقاسىندا قالىپتاستى. قازىرگى ۋاقىتتا 90 پايىزدان استام اشىق كەن ورىندارىن جەكە ينۆەستورلار يگەرۋدە. قازاقستاندا جەر قويناۋىن پايدالانۋ بويىنشا 866 كەلىسىمشارت قولدانىستا (كەڭىنەن تارالعان پايدالى قازبالارسىز)، سونىڭ ىشىندە قاتتى پايدالى قازبالار بويىنشا - 484، كومىرسۋتەكتى شيكىزات -214، جەراستى سۋلارى بويىنشا -168.

«وسى كەن ورىندارىنىڭ بارلىعى مەملەكەتكە كىرىس اكەلىپ، حالىقتى جۇمىسپەن قامتۋعا مۇمكىندىك بەرىپ وتىر. كەلەشەكتەگى ماقساتىمىز جاڭا پەرسپەكتيۆالى كەن ورىندارىن اشۋعا نەگىزدەلگەن. قازاقستان تاۋەلسىزدىگىنىڭ 25 جىلىندا جاڭا كەن ورىندارىن اشۋ باعىتىندا كوپتەگەن جۇمىستار اتقاردى. تاۋەلسىزدىك جىلدارى بۇرىن زەرتتەلگەن الاڭداردا ينۆەستورلارمەن جۇيەلى جۇمىستىڭ ناتيجەسىندە مىناداي كەن ورىندارىنا بارلاۋ جۇرگىزىلىپ، العاش رەت مەملەكەتتىك بالانسقا قويىلدى: 119 كومىرسۋتەكتى شيكىزات، 94 التىن، 14 مىس، 19 مارگانەتس كەنى، 16 تەمىر كەنى جانە 4 پوليمەتال كەن ورنى»، - دەدى ج. قاسىمبەك.

ونىڭ ايتۋىنشا، بۇرىن زەرتتەلگەن كەن ورىندارىنىڭ شيكىزات قورى كوبەيدى. اقمولا وبلىسىنداعى ۆاسيلكوۆسك جانە تاعى ءبىرقاتار كەن ورىندارىنىڭ قورلارى ەسەلەپ ارتا ءتۇستى.

اۆتور: رۋسلان عابباسوۆ