مينيستر ارىستانبەك مۇحامەدي ۇلى وليمپيادا چەمپيونى اتاعىنان ايىرىلعان زىلتەمىرشىلەرمەن كەزدەسەدى
بۇل تۋرالى بۇگىن مينيستر ۇكىمەت وتىرىسىنان كەيىن ب ا ق وكىلدەرىنىڭ ساۋالىنا وراي ايتتى، دەپ حابارلايدى قازاقپارات.
«ءبىز بۇل ماسەلەنى ۇلتتىق وليمپيادا كوميتەتىمەن بىرلەسىپ زەردەلەپ جاتىرمىز. بۇل حالىقارالىق قۇقىقتىق ماسەلە بولعاندىقتان، حالىقارالىق زاڭنامانى بارىنشا تىڭعىلىقتى قاراستىرۋدامىز. ويتكەنى، مۇنداي جايت قازاقستاندا ءبىرىنشى رەت بولىپ وتىر ءارى ماسەلە وتە كۇردەلى. تاياۋ ۋاقىتتا ءبىز حالىقارالىق كوزقاراس تۇرعىسىنان ناتيجەمىزدى جاريا ەتەتىن بولامىز»، - دەدى ول.
سونىمەن قاتار مينيستر يليا يلينگە قاتىستى حالىقارالىق وليمپيادا كوميتەتىنەن، حالىقارالىق اۋىر اتلەتيكا فەدەراتسياسىنان سپورتشىنىڭ ناتيجەلەرى جوققا شىعارىلاتىندىعى تۋرالى ارنايى حات ءالى كەلمەگەندىگىن اتاپ ءوتتى.
«تاعى دا قايتالاپ ايتامىز، ءبىز حالىقارالىق تاجىريبەنى بارىنشا تىڭعىلىقتى زەردەلەپ جاتىرمىز. ءتىپتى، الدىن الا سىزدەرگە بۇگىن سپورتشىلارىمىزبەن، سۆەتلانا پودوبەدوۆامەن، يليا يلينمەن كەزدەسەتىندىگىمىزدى ايتا الامىن. مۇنى سپورتشىلارىمىزدىڭ نازاردان تىس قالماۋى ءۇشىن جاسايمىز»، - دەدى مينيستر.
سونىمەن قاتار مۇحامەدي ۇلى باق وكىلدەرىنە بۇل ماسەلەدە سابىرلىق ساقتاۋعا قاجەتتىگىن ەسكەرتىپ، 1 اپتا ىشىندە سپورتشىلارىمىزعا قاتىستى ناقتى شەشىم قابىلداناتىندىعىن ايتتى.
ايتا كەتەيىك، حالىقارالىق وليمپيادا كوميتەتى دوپينگ سىنامادا تىيىم سالىنعان زاتتار تابىلعان 2012 -جىلعى وليمپيادا چەمپيوندارى سۆەتلانا پودوبەدوۆا، مايا مانەزا، زۋلفيا چينشانلونىڭ كورسەتكەن ناتيجەلەرىن جوققا شىعارىلعانىن رەسمي حابارلاعان بولاتىن.
