قورعاۋشىلارى سوتتان باقىتبەك ەسەنتايەۆتى اقتاۋدى سۇراپ جاتىر

استانا. قازاقپارات - باقىتبەك ەسەنتايەۆتىڭ سوتى اياقتالۋعا جاقىن. ءبىراق ازىرگە مەملەكەتتىك ايىپتاۋشىنىڭ باقىتبەك ەسەنتايەۆقا قانداي جازا سۇراپ وتىرعانى بەلگىسىز.

سوت پروتسەسى جابىق تۇردە ءوتىپ جاتقاندىقتان رەسمي ورگانداردىڭ ءوزى بۇل جايتتى قۇپيا ساقتاپ وتىر.

بۇل تۋرالى 31 ارنا حابارلايدى.

ال سوتتالۋشىنىڭ قورعاۋشىسى تاعىلعان ايىپپەن كەلىسپەيمىز دەيدى. سونداي-اق بۇگىنگى سوت وتىرىسىنا باقىتبەك ەسەنتايەۆتىڭ بۇرىنعى جارى، پروديۋسەر بايان ەسەنتايەۆا دا قاتىستى.

اراعا تۋرا 11 كۇن سالىپ باقىتبەك ەسەنتايەۆتىڭ سوتى قايتا جالعاستى. بۇل جولعى پروتسەستە قوس تاراپ جارىسسوزگە شىقتى. تۇسكە دەيىن دە، تۇستەن كەيىن دە جالعاسقان سوت وتىرىسىنىڭ ەسىگىن توراۋىلداپ جۇرگەن جۋرناليستەردەن باسقا ەشكىم جوق. ال پروكۋروردىڭ قانداي جازا سۇراعانى بەلگىسىز. بەلگىلىسى، باقىتبەك ەسەنتايەۆتىڭ قورعاۋشىسى ءاۋ باستا ەسەنتايەۆقا تاعىلعان ايىپ دۇرىس بولمادى دەپ وتىر.

«ءبىز سوتتان ونى اقتاۋدى سۇرادىق. وعان قىلمىستىق ىسكە قاتىستى قاتە ايىپتاۋلار تاعىلدى. ول ونداي قىلمىستاردى ىستەگەن جوق»، - دەيدى ەسەنتايەۆتىڭ قورعاۋشىسى بەكبولات جەكسەيىتوۆ.

قازىر باقىتبەك ەسەنتايەۆتى ەكى قورعاۋشى قورعاپ جاتىر. پروتسەستىڭ ءبىر ەرەكشەلىگى سوتتا شەشىمدى القا بيلەرى قابىلدايتىندىعىندا. ال بۇگىنگى پروتسەسكە تەگىمدى وزگەرتپەيمىن، ەسەنتايەۆا بولىپ قالامىن دەگەن بايان دا كەلدى. سوتتان كەيىن قورعاۋشىسىمەن دالادا ءسال كىدىرىپ تۇرىپ قالدى.

باقىتبەك ەسەنتايەۆتىڭ ەندىگى سوت وتىرىسى 3 -قاراشا وتەدى. 20 جىلدان استام وتاسقان جۇبايىن پىشاقتادى دەپ ايىپتالعان باقىتبەك ەسەنتايەۆقا بالكىم ءدال وسى كۇنى ۇكىم دە شىعىپ قالۋى مۇمكىن.

ماۋسىمنىڭ 10 ى كۇنى بايان ەسەنتايەۆانى كۇيەۋى سوققىعا جىعىپ، ءۇش جەرىنەن پىشاقتاعان بولاتىن. ارتىنشا پروديۋسەرگە 3 ساعات بويى وتا جاسالىپ، كۇيەۋى باقىتبەك ەسەنتايەۆ قاماۋعا الىنعان. قايعىلى وقيعا تالعار اۋدانىن تراسساسىندا بولعان. پروديۋسەر ماۋسىمنىڭ 19 ى كۇنى اۋرۋحانادان شىعارىلدى.