الماتى وبلىسىندا ءۇش اعايىندىنىڭ ولىمىنە قاتىستى ءىس سوتقا جىبەرىلدى
وسى ءىس الماتى وبلىسىنىڭ مامانداندىرىلعان اۋدانارالىق سوتىندا قارالادى. سوتتالۋشىلار قاتارىندا تالعات سۇلەيمانوۆ پەن مۇرات وڭالبايەۆتار بار. ولارعا ق ر قىلمىستىق كودەكسىنىڭ 99-بابىنىڭ 2-بولىگى («ادام ءولتىرۋ») بويىنشا ايىپ تاعىلعان. سونىمەن قاتار، تاعى ءبىر جەرگىلىكتى مالشىعا قاتىستى «قىلمىس تۋرالى حابارلاماۋ» بابى بويىنشا ايىپ تاعىلعان.
ەسكە سالايىق، قىركۇيەك ايىندا تالدىقورعان قالاسىنا جاقىن ماڭداعى كوكسۋ اۋدانىنىڭ 3 تۇرعىنى الماتى جاقتاعى ۇزىناعاش بازارىندا مال ساتامىز دەپ، ءىز-ءتۇسسىز جوعالىپ كەتكەن بولاتىن. ولار، جارقىنبەك دولدان 1979-جىلعى، مۇقيات زارلىحان 1973-جىلعى جانە ءالىمحان قادىلبەك شىعىس قازاقستان وبلىسى تارباعاتاي اۋدانىنان 40 باس مالمەن الماتىعا قاراي شىققان. كەيىنىرەك ولاردىڭ ءمايىتى ۇزىناعاشتان 200 شاقىرىم جەردە تابىلعانى حابارلانعان ەدى. ۆەدومستۆوداعىلاردىڭ ايتۋىنشا، مارقۇمداردىڭ دەنەسىندە زورلىق بەلگىلەر بار. پوليتسەيلەر كىسى ءولتىردى دەگەن كۇدىكتىلەردى ۇستادى. ولار جامبىل اۋدانىنىڭ ەكى تۇرعىنى. كۇدىكتىلەر ۋاقىتشا ۇستاۋ يزولياتورىنا قامالدى. ايتا كەتەيىك، ۇستالعاندار ەكى ايعا قاماۋعا الىندى - 24- قاراشاعا دەيىن.
