اسكەريلەر ومىرتقاسى سىنعان قىزدى پەتەربۋرگتەن استاناعا جەتكىزىپ بەردى
دەپ حابارلايدى قازاقپارات قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
كەمە ەكيپاجى رەسەي فەدەراتسياسى اسكەري- تەڭىز فلوتىنىڭ اسكەري وقىتۋ- عىلىمي ورتالىعىنىڭ دايارلاۋ ورتالىعىنىڭ بازاسىندا تەوريالىق ازىرلىكتەن جانە فين شىعاناعىندا كەمە قىزمەتىنىڭ ءىس- تاجىريبەسىن مەڭگەرۋ دايىندىقتارىنان ءساتتى ءوتتى. سونداي- اق، كەمەلەردىڭ ءجۇرىس سىناقتارىنا دا قاتىستى. بۇل جولى قازاقستاندىق اسكەري تەڭىزشىلەردىڭ وتانعا ورالۋى ەرەكشە جاعداي بولدى.
سانكت- پەتەربۋرگ پوليتەحنيكالىق ۋنيۆەرسيتەتىنىڭ ستۋدەنتى اقجارقىن ماحامبەتوۆانىڭ وتباسى اسكەري قىزمەتشىلەردىڭ كومەگىنە جۇگىنگەن. وقۋ كەزىندە اقجارقىن كەنەتتەن قۇلاپ، بەل ومىرتقاسىنان زاقىمدانىپ، جاراقات العان. وتا جاسالعاننان كەيىن ءارى قاراي ەم قابىلداۋ ءۇشىن قىزدى قازاقستانعا جەتكىزۋ قاجەتتىگى تۋىنداعان. وپەراتسيادان كەيىن اقجارقىن ەشقانداي قوزعالىسسىز كولدەنەڭ قالىپتا جاتۋى ءتيىس بولعاندىقتان دا تاسىمالداۋ قيىنعا ءتۇستى. قورعانىس مينيسترلىگىنىڭ باسشىلىعى وسى جاعدايدى ەستىگەن سوڭ، وتباسىنا قول ۇشىن بەرىپ، كومەك كورسەتەتىن بولادى.
سانكت- پەتەربۋرگ قالاسىنان اقتاۋعا قايتىپ كەلە جاتقان اسكەري قىزمەتشىلەر س-295 اسكەري- كولىكتىك ۇشاقتىڭ بورتىنا اقجارقىن مەن ونىڭ اناسىن جانە اسكەري مەيىربيكەنى وزدەرىمەن بىرگە الىپ، دەرەۋ استانا قالاسىنا جەتكىزەدى.
«ءبىز سونداي ءبىر قامقورلىقتى سەزىندىك. مۇنداي اۋىر جاعدايدا ويلانباستان بىردەن كومەك كورسەتكەنى ءۇشىن بارشا اسكەريلەرگە - تەڭىزشىلەر، ۇشقىشتار مەن مەيىربيكەلەرگە زور العىسىمدى بىلدىرەمىن. ناعىز قورعاندارىمىز دەپ ەسەپتەيمىن بۇل جانداردى»، - دەپ جاراقات العان قىزدىڭ اناسى ءوزىنىڭ ريزاشىلىعىن ءبىلدىردى.
«قورعانىس مينيسترلىگىنىڭ باسشىلىعىمەن ق ر ق ك ءا ت ك كەمە ەكيپاجىنىڭ جەكە قۇرامىن جانە قازاقستاننىڭ ەكى ازاماتىن سانكت- پەتەربۋرگتان استاناعا جەتكىزۋ تۋرالى تاپسىرما كەلىپ ءتۇستى. العا قويعان مىندەتتى ورىندادىق»، - دەيدى س-295 ۇشاعىنىڭ ەكيپاج كومانديرى مايور ازامات مولداحمەتوۆ.
