جازيرا بايىربەكوۆا ءوزىنىڭ اندەرىن ورىنداپ جۇرگەندەرگە رەنىشىن جەتكىزدى

استانا. قازاقپارات - ءانشى جازيرا بايىربەكوۆا ءوزىنىڭ داۋىسىمەن حالىقتى الداپ جۇرگەندەرگە رەنىشىن جەتكىزدى.

ءوزىنىڭ instagram-داعى پاراقشاسىندا: «اندەردىڭ كوبىسى ماعان داپ-دايىن بولىپ كەلە سالمايدى. "قىز باقىتى" ءانىن اۋەسقوي سازگەر ەربول بايىربەكوۆكە تاپسىرىسپەن جازدىرىپ، ۇناماعان جەرلەرىن ءوزىم وڭدەپ، ءسوزىن جازدىرۋ ءۇشىن اينۇر تۇرسىنبايەۆاعا اپارىپ، قىز ۇزاتىلعاندا ايتىلاتىن سوزدەر كەرەك ەكەنىن ءتۇسىندىرىپ (اينۇر قالاماقى الماي قويدى)، ودان كەيىن وڭدەۋشىگە اپارىپ، وڭدەتتىم. انىنە، وڭدەۋىنە كەتكەن قارجىنى قوسپاعاندا، ويلانىپ، تولعانىپ، ءتۇن ۇيقىمدى ءبولىپ دايىنداعان ءانىمدى قازىر تالاي قىز-كەلىنشەك ورىنداپ ءجۇر. مەنىڭ ارانجيروۆكامدى پايدالانىپ، ءوز داۋىستارىمەن ورىنداپ جۇرگەندەرگە ەش قارسى ەمەسپىن. ال ەندى مەنىڭ داۋىسىممەن حالىقتى الداپ جۇرگەندەردىڭ سانى تىپتەن كوبەيىپ بارادى. قۇرمەتتى ينستا دوستار! مەن بۇعان كوز جۇمىپ جۇرە بەرەيىن بە الدە؟.. قالاي ويلايسىزدار؟» - دەپ جازعان.

وسى جازباسىنا جەلى قولدانۋشىلارى تولاسسىز پىكىر جازعان. سودان كەيىن ءانشى ەكىنشى سۋرەتىن سالىپ العاشقى رايىنان قايتقانىن ءبىلدىردى. «وسىنىڭ الدىندا سالعان پوستتا مەنىڭ داۋىسىممەن اۋزىن جىبىرلاتىپ جۇرگەن قىزعا ابدەن ۇرىسىپسىزدار. مەن ول قىزدى ءوزىم اياپ كەتتىم. ءبىراق سىزدەردىڭ پىكىرلەرىڭىزدى وقىپ وندايلار ەندى ازايادى دەگەن سەنىمدەمىن. كىشكەنتاي كۇنىمىزدە بىرەۋ رەنجىتسە ماماما نەمەسە پاپاما ايتىپ بەرەم دەپ بۇرتياتىن ەدىك قوي. سول سياقتى ينستا دوستارىما ايتىپ بەرەم دەگەن ەسكەرتۋ بولسىن. سوتقا بەرمەي-اق، ول قىزدارعا سىزدەردىڭ ۇرىسقاندارىڭىز جەتكىلىكتى دەپ ويلايمىن» - دەپ جازعان.