باۋىرجان وسپانوۆ بوكسشى نازىم قىزايبايعا ءۇي سالىپ بەردى
بۇل جونىندە سپورتشى الەۋمەتتىك جەلىدەگى ينستاگرامم پاراقشاسىنا جازعان.
«سالەمەتسىزدەر مە مەنىڭ قۇرمەتتى ينستا وقىرماندارىم.
مەن 2014 -جىلى ءبىرىنشى رەت الەم چەمپيوناتىن ۇتقاندا باۋىرجان وسپانوۆ اعامىز ماعان كولىك سىيلاعان ەدى، ال 2016 -جىلى مامىر ايىندا ءوزىمىزدىڭ استانادا وتكەن الەم چەمپيوناتىنىڭ جەڭىمپازى بولىپ، الەمنىڭ ەكى دۇركىن چەمپيونى اتانعاندا ماعان جانە اتا-انا، باۋىرلارىما ۇلكەن ءۇي سالىپ بەرەمىن دەگەن ەدى. مىنە، قازىر سول ۇيگە كوشىپ كەلدىك. وسىنداي اعامىزعا بارلىق وتباسىمىزدىڭ اتىنان ۇلكەن راحمەت ايتقىم كەلىپ وتىر! وسىنداي باۋىرجان اعامىزداي، قازاقتىڭ سپورتقا دەگەن بارلىق جاعىنان كومەكتەسىپ، كوڭىل ءبولىپ جۇرگەن اعالارىمىزعا مىڭ دا ءبىر راحمەت!!! امان بولىڭىز، باۋىرجان اعا!» - دەپ چەمپيون ءوز قۋانىشىمەن بولىسكەن.
ايتا كەتۋ كەرەك، سپورت جاناشىرى باۋىرجان وسپانوۆقا قانات يسلام دا ءوز العىسىن جاۋدىرعان بولاتىن. جانە مەتسەنات ءوزىنىڭ جەرلەستەرىنە دە ەرەكشە قامقورلىعىن جاساۋدا. قازىر الماتى وبلىسى الاكول اۋدانى جىلاندى اۋىلىنىڭ حالقىنا بار جاعداي جاسالعان. اۋىلدا كينوتەاتر، سپورتزال، دەمالىس الاڭى، تويحانا سىندى حالىق ءۇشىن اسا قاجەتتى عيماراتتاردىڭ بارلىعىن باۋىرجان وسپانوۆ جوندەپ، ەل يگىلىگىنە بەردى. سونداي-اق اتالعان اۋىل حالقى ىشىمدىكتەن باس تارتقان. تۇرعىندارعا قىمىز كۇندەلىكتى تەگىن تاراتىلادى. وقۋشىلارعا ساپالى ءبىلىم بەرۋ ماقساتىندا اۋىلعا قالانىڭ بىلىكتى ماماندارىن مەسەنات ءوزى ارنايى شاقىرىپ، ولارعا بارلىق جاعدايدى جاساپ بەردى. جاڭا باسپانا سالىپ بەرىپ، جالاقىلارىن دا بىرنەشە ەسە ءوسىرىپ بەردى.
