باتىس ەۋروپا- باتىس قىتاي اۆتو ءدالىزىنىڭ قۇرىلىسى اياقتالۋعا جاقىن
جىبەك جولىن جاڭعىرتقان مەگاماگيسترال قۇرىلىسىنا العاش بولىپ سىربويىلىقتار كىرىستى. عالامات جوبا اياسىندا ايماقتاعى شاعىن جانە ورتا بيزنەس جاندانىپ، وڭىردە 16 مىڭنان استام جۇمىس ورىندارى اشىلدى. 2787 شاقىرىمعا سوزىلعان اۆتوباننىڭ سىر وڭىرىنەن وتەتىن 812 شاقىرىمدىق ەڭ ۇزىن تۇسى جاقىن كۇندەرى اياقتالادى.
«باتىس قازاقستاننان كەلە جاتىرمىن. اقتوبە وبلىسىنان شىمكەنتكە قاراي. جولدى كورىپ تاڭ قالىپ وتىرمىن. جاقسى، وتە تاماشا. ايىنا 1-2 رەت جۇرەمىز. سول شامادا. شارشايتىن ەدىك جەتە الماي، بايقوڭىردان وسى جەرگە دەيىن جەتۋدىڭ وزىنە كۇن جارىم ۋاقىت كەتەتىن ەدى. ەندى 3 ساعاتتا كەلىپ تۇرمىن، 200-دەن استام شاقىرىمدى»، - دەيدى جۇك كولىگىن جۇرگىزۋشى ەلىكباي قاشىمبايەۆ.
سىرداريا اۋدانىنىڭ تۇرعىنى ەرلان سپانوۆ تا ءوز بولاشاعىن جولمەن بايلانىستىرادى. وتكەن جىلى كاسىپكەر اۆتوءدالىز بويىنان قىزمەت كورسەتۋ كەشەنىن اشىپ، 30 اۋىلداسىنا جۇمىس كوزىن تاۋىپ بەردى.
«وسى جول اشىلعالى بۇرىن ءبىز كورمەگەن شەتەلدىك جولاۋشىلار ءجيى كەلىپ جاتىر. ادامنىڭ دا، كولىكتىڭ دە كوبەيگەنى وسى جاڭا جولدىڭ ارقاسىندا جاقسى ءبىلىنىپ تۇر. قازىرگى تاڭدا 40 ورىندىق اسحانا بار، 20 ورىندىق قوناق ءۇي بار. ت ج ب، جەلىمدەۋ، شاعىن دۇكەن جۇمىس جاساپ تۇر. شاشتاراز، سەبەزگى جۇمىس ىستەيدى»، - دەيدى كەشەن مەڭگەرۋشىسى ەرلان سپانوۆ.
قازىرگى تاڭدا حالىقارالىق ماگيسترالدىڭ ايماقتاعى ترانزيتتىك بولىگى 99 پايىز پايدالانۋعا دايىن. قۇرىلىسىنا 164 ميلليارد تەڭگە جۇمسالعان جولدىڭ بويىندا 48 كوپىر، 14 جول ايىرىعى مەن 83 مال وتكەلى سالىندى.
«بۇرىنعى جول قاباتى 30 س م ەدى، وبلىس بويىنشا 8 س م اسفالت، استىندا 22 س م تاس قاباتى بار- تۇعىن. قازىر ءار جەردىڭ ىڭعايىنا قاراي 75-85 س م قالىڭدىق. بۇرىن 8-9 توننا سالماق كوتەرەتىن بولسا، قازىر 13 توننا سالماق كوتەرەتىن جاعدايعا جەتتى. 120 شاقىرىم\ساع جىلدامدىقپەن جۇرەتىندەي سالىنعان جول. بۇل جول 15 جىلعا دەيىن دەپ ەسەپتەلىپ سالىنىپ جاتىر»، - دەيدى «قازاۆتوجول» ۇ ق ا ق وبلىستىق فيليالى ديرەكتورىنىڭ ورىنباسارى شانجارحان مىرزاباي.
قىتايدان باتىس ەۋروپاعا تەڭىز ارقىلى 40 كۇندە جۇك جەتكىزىلسە، كولىك ءدالىزى تولىق پايدالانۋعا بەرىلگەن كەزدە 10 اق كۇندە تاسىمالداناتىن بولادى. سالا ماماندارى 2020 -جىلعا قاراي جۇك اينالىمى شامامەن 40 ميلليون تونناعا جەتەدى دەپ بولجام جاساپ وتىر.
