يەمەن اۋماعىنان مەككە باعىتىندا زىمىران ۇشىرىلدى

ءابۋ- دابي. قازاقپارات - يەمەندە سوعىسىپ جاتقان اراب ەلدەرىنىڭ كواليتسياسى يەمەننىڭ شيت جاساعى ۇشىرعان بالليستيكالىق زىمىراندى ەرتە انىقتاپ، دىتتەگەن جەرىنە جەتكىزبەي جويعانىن مالىمدەدى، دەپ حابارلادى «قازاقپارات» ح ا ا- نىڭ تاياۋ شىعىستاعى مەنشىكتى ءتىلشىسى.

سااد پروۆينتسياسىنان ۇشىرىلعان زىمىران ساۋد ارابياسىنىڭ قاسيەتتى قالاسى مەككەدەن 65 شاقىرىم جەردە جويىلدى جانە ول مۇسىلمانداردىڭ قاسيەتتى جەرىنە بەت العان- مىس.

«حۋسيتتەردىڭ» قاتىسۋىمەن بولۋى مۇمكىن بۇل وقيعانى التى ەل: باحرەين، كۋۆەيت، بىرىككەن اراب امىرلىگى، كاتار، ساۋد ارابياسى مەن ومان سىنعا الدى.

مىسىرلىق اسكەري ساراپشى حيشام ال حالابي سنارياد «جەر-جەر» ساناتىنداعى Scud بالليستيكالىق زىمىرانى بولىپ تابىلاتىندىعىن اتاپ ءوتتى. ونىڭ باعالاۋىنشا، زىمىراننىڭ جويۋ راديۋسى 300 شاقىرىمنان اسادى جانە ول جەردەگى نىسانداردى كۇل-تالقان ەتەدى.