قانات يسلامنىڭ قارسىلاسى الا الماعان جۇلدەسى ءۇشىن جىلادى

استانا. قازاقپارات - قانات يسلامنىڭ قارسىلاسىنىڭ جاتتىقتىرۋشىسى وفوري اساري قازاقستان تۋرالى جاقسى كوزقاراسىنىڭ كۇل-تالقانى شىققانىن ايتتى.

گانا بوكسشىسى پاتريك اللوتەيدىڭ جاتتىقتىرۋشىسى قانات يسلاممەن بولعان كەزدەسۋ قورىتىندىسىنا (22-0, 18 ك و) كەلىسپەيتىندىگىن جەتكىزدى، دەپ حابارلايدى Vesti.kz.

ەسكە سالا كەتەلىك، گانادان كەلگەن پاتريك اللوتەيمەن وتكەن جەكپە-جەك 12 راۋندقا سوزىلدى. ەكى بوكسشى دا ايانىپ قالمادى. ۇپاي ايىرماشىلىعىمەن جەرلەسىمىز جەڭىسكە جەتتى. وسىلايشا، قانات كاسىپقوي بوكستاعى 22 كەزدەسۋىن جەڭىسپەن اياقتادى. ال پاتريك اللوتەي وسىمەن ءۇشىنشى رەت جەڭىلىسكە ۇشىرادى. جالپى شارشى الاڭدا 37 كەزدەسۋ وتكىزگەن. ونىڭ 34 ىندە قارسىلاستارىنان باسىم تۇسكەن. نوكاۋت سانى - 24. باسكە ەكى تيتۋل تىگىلدى: WBA Fedelatin جانە ورتا سالماقتاعى العاشقى WBO Intercontinental. قانات يسلام ەكى بىردەي تيتۋلدى ۇتىپ الدى. جەكپە-جەكتەن سوڭ اللوتەي كيىم كيەتىن جەردە ومىرىندەگى ءۇشىنشى جەڭىلىسى ءۇشىن قاتتى وكىنىپ، جىلادى. اساريدىڭ ايتۋىنشا، بۇل ناتيجە ءادىل بولمادى.

- ادىلەتسىزدىك بولدى. بۇل پاتريكتىڭ ءومىر بويى دايىندالعان جەكپە-جەگى ەدى. بۇلاي ەش جەردە، ەشقاشان بولعان ەمەس. مەن مۇنداي باسسىزدىقپەن ءبىرىنشى رەت بەتپە-بەت كەلىپ تۇرمىن. وسىدان كەيىن قازاقستان تۋرالى جاقسى كوزقاراسىمنىڭ كۇل-تالقانى شىقتى. مەنىڭ ءسوزىم جوق» - دەدى اللوتەيدىڭ جاتتىقتىرۋشىسى.