جەزقازعان ماڭىنا عارىشكەرلەر قوندى

استانا. قازاقپارات - «سويۋز م س» اۋە كەمەسىنىڭ ەكيپاج مۇشەلەرى جەرگە ءساتتى ورالدى، دەپ حابارلادى قازاقپارات ۇشۋلاردى باسقارۋ ورتالىعىنىڭ باسپا ءسوز قىزمەتىنە سىلتەمە جاساپ.

قۇرامىندا رەسەيلىك عارىشكەر اناتولي يۆانيشين، جاپونيالىق استروناۆت تاكۋيا ونيشي مەن امەريكالىق استروناۆت كەتلين رۋبينس بولعان عارىش اپپاراتى بەلگىلەنگەن ورىنعا - جەزقازعان قالاسىنىڭ وڭتۇستىك-شىعىسىنا قوندى.

ەكيپاج 2016-جىلى 30- قازاندا استانا ۋاقىتىمەن 9 ساعات 59 مينۋتتا قوندى. عارىشكەرلەر بولعان كاپسۋلا قازاقستاندىق جەرگە ءبىر مينۋت بۇرىن ءتۇستى.

ۇشۋلاردى باسقارۋ ورتالىعىنىڭ باسپا ءسوز قىزمەتىنەن اتاپ وتكەندەي، قونۋ ۇدەرىسى شتاتتىق رەجىمدە ءوتتى. م ك س-48/49 ەكسپەديتسياسىنىڭ ەكيپاجى عارىشتا 115 تاۋلىك بولدى.