اقتاۋلىق مۋزىكانت گرۋزيادا وتكەن حالىقارالىق فەستيۆالدا جەڭىمپاز اتاندى
بۇل سىيلىق وعان «ينسترۋمەنتالدى مۋزىكا» اتالىمى بويىنشا ەرەسەكتەر اراسىندا وتكەن سىندا ۇزدىك دەپ تانىلعانى ءۇشىن بەرىلدى، دەپ حابارلايدى قازاقپارات lada.kz. سايتىنا سىلتەمە جاساپ.
نابيار قازاق كۇيلەرىنەن پوپۋري ورىنداپ، تانىمال مۋزىكانتتار مەن ونەرسۇيەر قاۋىمدى وزىنە ءتانتى ەتتى. اقتاۋلىق مۋزىكانت ماحامبەتتىڭ «جۇمىر قىلىشىن»، قۇرمانعازىنىڭ «جيما»، «اداي»، «سارىارقا»، داۋلەتكەرەيدىڭ «كورۇعلى»، ەسبايدىڭ «بوگەلەك» كۇيلەرىن بابىنا كەلتىرە ورىندادى.
نابيار التايەۆ «شابىت» قازاق ۇلتتىق ونەر ينستيتۋتىنىڭ تۇلەگى. ول وتكەن جىلى يسپانيادا وتكەن «Open Spain» بايقاۋىندا ءۇشىنشى ورىندى جەڭىپ الدى.
استراحاندا وتكەن «التىن دالا داۋىستارى» حالىقارالىق كونكۋرسىندا 2- دارەجەلى لاۋرەات اتاندى. بۇل بايقاۋعا گرۋزيا، رەسەي، وزبەكستان، ۋكراينا، يسپانيا، يزرايل، قازاقستان، ءۇندىستان، ارمەنيا، ازەربايجان سياقتى مەملەكەتتەردەن 400 دەن استام ورىنداۋشىلار مەن توپتار قاتىسقان بولاتىن.
