قازاقستاندىقتارعا «قورعاستا» كۋالىكسىز جۇرۋگە رۇقسات ەتىلەدى
«قازىرگى تاڭدا ەل ازاماتتارى شەكارادان شەتەلدىك ءتولقۇجات ارقىلى وتەدى. قاراشا ايىنىڭ 1 نەن باستاپ، «قورعاس» ايماعىندا شەكارادان ءوتۋ ءتارتىبى وزگەرەدى. ەندى ول جەردەن جەكە كۋالىك ارقىلى دا وتۋگە بولادى، ال بالالارعا تۋۋ تۋرالى كۋالىك قاجەت»، - دەدى ورتالىقتىڭ پرەزيدەنتى قاھارمان جازين قازاقستاندىق جۋرناليستەرگە ارنالعان باسپا ءسوز تۋرىنىڭ بارىسىندا.
بۇعان قوسا ول قورعاستاعى ۇزىن-سونار كەزەكپەن بايلانىستى ماسەلەنىڭ قالاي شەشىلەتىنىن ايتتى. ونىڭ مالىمەتتەرى بويىنشا، 2012-جىلى «قورعاستان» 310 مىڭ ادام وتكەن. بيىلعى جىلى وسى كۇننىڭ وزىندە ول جەرگە قاتىنايتىن ازاماتتار سانى 3 ميلليوننان اسىپ جىعىلادى. الدىن الا بولجام بويىنشا، 2020-جىلعا قاراي ورتالىقتان وتەتىن ادامدار سانى 8 ميلليونعا دەيىن جەتەدى.
«ءبىز قازىر ۇزىن-سونار كەزەكتىڭ ماسەلەسىن شەشۋ باعىتىندا كەشەندى شارالاردى جۇزەگە اسىرۋدامىز. بىرىنشىدەن، ءبىز «قازپوشتا» ۇيىمىنىڭ قابىلداۋ تىرەكتەرىنىڭ سانىن، وسى جۇكتەردى جانە كولىكتەردى قابىلدايتىن ادامدار سانىن كوبەيتەمىز. كوكتەمدە «قازپوشتا» ۇلكەن جۇك تەرمينالىنىڭ قۇرىلىسىن باستايدى. جىبەرۋ تارتىبىمەن بايلانىستى قازىرگى پروبلەمالار شەشىلەدى»، - دەدى ول.
بۇعان قوسا ۇيىمداسقان تۋريستەر ءۇشىن جەكە دالىزدەر مەن «قازپوشتانىڭ» قابىلداۋ تىرەكتەرى بولىنەتىن بولادى.
«ءبىر كۇنگە، قاجەتتى زاتىن الۋ ءۇشىن كەلەتىن ۇيىمداسقان تۋريستەر الىپساتارلىقپەن اينالىسپايدى. ەندى ولار ءۇشىن ارنايى ءدالىز جاسالىپ، الدىن الا مالىمەتتەرىن ۇسىنعان ۇيىمداسقان تۋريستەر شەكارادان نەبارى بىرنەشە مينۋتتىڭ ىشىندە ءوتىپ ۇلگەرەدى. ولار قايتاردا جۇكتەرىمەن شىعاتىن كەزدە دە سولاي بولادى. وسىنداي تارتىپپەن ءبىز الىپساتارلىقپەن اينالىسپايتىن ادامدار اراسىندا تۋريزم ۇيىمداستىرماقپىز»، - دەپ قورىتتى ءسوزىن قاھارمان جازين.
ايتا كەتەيىك، «قورعاس» حالىقارالىق شەكارالىق ىنتىماقتاستىق ورتالىعى الماتى وبلىسىنىڭ پانفيلوۆ اۋدانىنا قاراستى قازاقستان-قىتاي شەكاراسىندا ورنالاسقان. مۇنداي ايماقتىڭ قۇرىلۋى مەملەكەتتەردىڭ شەكارا ايماعىندا ۆيزاسىز كەزدەسۋ ۇيىمداستىرۋلارىنا مۇمكىنىك جاسايدى. سونداي-اق ول قازاقستان، قىتاي جانە ت م د ەلدەرىنىڭ تاۋارلارىن تانىستىرىپ، ءتيىستى كەلىسىمدەر جاساۋ ءۇشىن دە ىڭعايلى.
