رەسەي قازاقستانداعى ەمبى پوليگونىن جالداۋدى توقتاتتى
«بۇل حاتتاما رەسەيدىڭ قازاقستاننان جالعا العان پوليگونداردىڭ جەر ۋچاسكەلەرىن وڭتايلاندىرۋ بويىنشا قازاقستان مەن رەسەي پرەزيدەنتتەرىنىڭ كەلىسىمىن ودان ءارى جۇزەگە اسىرۋ ماقساتىندا دايارلانعان. بۇل باعىتتاعى جۇمىستاردىڭ ءبىرىنشى كەزەڭى سارىشاعان پوليگونى مەن رەسەي فەدەراتسياسىنىڭ قورعانىس مينيسترلىگىنىڭ مەملەكەتتىك ۇشۋ-سىناق ورتالىعىنىڭ 929 اسكەري الاڭدارىنىڭ شەكارالارىن ناقتىلاۋمەن بايلانىستى 2015-جىلى قول قويىلعان قۇجاتپەن بايلانىستى بولاتىن»، - دەپ ءتۇسىندىردى ر ف قورعانىس مينيسترلىگى باسشىسىنىڭ ورىنباسارى اناتولي انتونوۆ.
حاتتاماعا سايكەس، 300 مىڭعا جۋىق گەكتار جەر جالعا الۋ ايماعىنان شىعارىلادى. «ءبىز جەر تەلىمدەرىن يگەرۋ باعىتىنداعى قازاقستاندىق ارىپتەستەرىمىزدىڭ مۇددەلەرىن ەسكەرۋگە بارىنشا تىرىستىق»، - دەدى انتونوۆ 20- قازان كۇنى قول قويىلعان قۇجاتقا قاتىستى ماسەلەلەردى ءسوز ەتە كەلە.
قازاقستاننىڭ حالىق شارۋاشىلىعىنا زامانعا ساي كوممۋنيكاتسيالاردىڭ قۇرىلىستارى مەن پايدالى قازبالاردى يگەرۋ شارالارى جۇرگىزىلەتىن ايماقتار قايتارىلادى.
بۇعان قوسا رەسەي فەدەرالدىق بيۋدجەتى پوليگوندى جالداۋ ءۇشىن جىل سايىن جۇمسالاتىن $0,718 ميلليون ۇنەمدەيدى. پوليگونداردى پايدالانۋ مەن سىناقتاردى وتكىزۋ بويىنشا، رەسەي تاراپى قازاقستاننىڭ قورعانىس مينيسترلىگىمەن ءوزارا بايلانىستاردى دامىتا بەرمەك.
«ويتكەنى ءبىزدىڭ پوليگونداردا سىناقتان وتەتىن تەحنيكالار مەن قارۋ-جاراقتار تەك قازاقستان مەن رەسەيدىڭ عانا يگىلىگى ءۇشىن قىزمەت ەتپەيدى» - دەدى ر ف قورعانىس ءمينيسترىنىڭ ورىنباسارى.
