02:25, 30 - قازان 2016 | GMT +5
سولتۇستىك قازاقستاندا جولاۋشىلاردى ماس جۇرگىزۋشىلەر تاسىمالداۋدا
پەتروپاۆل. قازاقپارات - «اۆتوبۋس» جەدەل الدىن الۋ شاراسىنىڭ ەكى كۇنىندە س ق و پوليتسەيلەرى قوعامدىق كولىك جۇرگىزۋشىلەرى تاراپىنان جولدا ءجۇرۋ ەرەجەسىن بۇزۋدىڭ 161 فاكتىسىن انىقتادى، دەپ حابارلادى قازاقپارات س ق و ءى ءى د باسپا ءسوز قىزمەتىنە سىلتەمە جاساپ.
ولاردىڭ 13 ى كولىكتى قۇجاتسىز باسقارۋ، 62 سى ۇيالى تەلەفونمەن سويلەسۋ فاكتىلەرى، 28 جۇرگىزۋشى جىلدامدىقتى اسىرسا، 7 جۇرگىزۋشى مىندەتتى تەحنيكالىق باقىلاۋدان وتپەگەن كولىكپەن جولعا شىققان. سونىمەن قاتار، ماس كۇيىندە پريبرەجنوە اۋىلىنان وبلىس ورتالىعىنا جولاۋشىلاردى تاسىمالداعان «ۆاز 2106» كولىگىنىڭ جۇرگىزۋشىسى ۇستالدى.
بۇدان بولەك، «پەتروپاۆل- قاراعاندى» باعىتىنا قىزمەت كورسەتەتىن اۆتوتاسىمالداۋشى جولدا ءجۇرۋ ەرەجەسىنىڭ ورەسكەل بۇزىلۋىنا جول بەرگەن. تايىنشا اۋدانىندا توقتاتىلعان «مانن» ماركالى اۆتوبۋستى باسقارعان ازاماتتىڭ جۇرگىزۋشىسى كۋالىگىندە ءتيىستى سانات بولماعان. اكىمشىلىك حاتتاما تولتىرىلىپ، جۇرگىزۋشى جۇمىسىنان شەتتەتىلدى. جولاۋشىلار وزگە اۆتوبۋسقا وتىرعىزىلدى.
