ز. باليەۆا: بۇرىن جەتىم بالالاردى اتا-انالار تاڭدايتىن، ەندى كەرسىنشە بولادى - فوتو

استانا. قازاقپارات - جەتىم بالالار ءوز بەتتەرىنشە وتباسىلاردى تاڭداۋىنا مۇمكىندىكتەرى بار.

بۇل تۋرالى بۇگىن استانادا ءوتىپ جاتقان I رەسپۋبليكالىق اكەلەر فورۋمىندا بالالاردىڭ قۇقىقتارىن قورعاۋ جونىندەگى ۋاكىل زاعيپا باليەۆا ايتتى، دەپ حابارلايدى Baq.kz ءتىلشىسى.

«وسىعان دەيىن جەتىم بالالاردى اتا-انالار تاڭداپ الاتىن. مەن بالالاردىڭ قۇقىقتارىن قورعاۋ جونىندەگى ۋاكىل رەتىندە جاعدايدىڭ وزگەرگەنىن قالايمىن. ەندى قاي وتباسىعا باراتىنىن بالالاردىڭ وزدەرى تاڭداۋ كەرەك. ول ءۇشىن كوپ نارسەنى ويلاستىرۋىمىز قاجەت. بالا اسىراپ العان وتباسى سابيلەردى قورلاماي، قيىن جاعدايعا قالدىرمايتىنداي بولۋى ءتيىس»، - دەيدى ز. باليەۆا.

ول سونداي-اق بالالارعا دا بارلىعىن ءتۇسىندىرۋ كەرەك ەكەندىگىن ايتادى. ەكى تاراپ ءبىر- بىرىمەن تۇسىنىسە العاندا عانا تولىققاندى وتباسى بولادى.

«ارينە، بالالارعا دا بارلىعىن ءتۇسىندىرۋىمىز قاجەت. جاڭا وتباسىعا بارعان كەزدە سول ءۇيدىڭ تارتىبىنە باعىنۋى ءتيىس. وتباسى بولعان سوڭ، ءار ءتۇرلى جاعدايلار بولىپ تۇرادى. سونداي كەزدە تۇسىنىستىك تانىتقاندارى دۇرىس»، - دەيدى دەپۋتات.

زاعيپا باليەۆانىڭ ايتۋىنشا، جەتىمدەر ۇيىنەن شىققان بالالاردىڭ 40 پايىزى قازىرگى كەزدە جوعارى ءبىلىم العان. ال بۇرىن ۋنيۆەرسيتەتتە وقيتىنداردىڭ ۇلەسى 4 پايىزدان اسپاعان ەكەن.

ۋاكىل سونىمەن قاتار اتا- اجەلەردى قازىرگى اقپاراتتىق تەحنولوگيالاردى كەڭىنەن قولدانۋعا، تەگىن كومپيۋتەرلىك كۋرستارعا قاتىسۋعا كەڭەس بەردى.

«ءبىز ءوز بالالارىمىزدان قالىپ قويدىق. ولار عالامتوردا كوپتەگەن الەۋمەتتىك جەلىلەردى شارلاپ جۇرەدى. ال اتا-اناسى جاقىنداي قالسا، نوۋتبۋگىن بىردەن جاۋىپ تاستايدى. سول كەزدە ونىڭ نە ىستەگەنىن، قاي جەلىدە وتىرعانىن بىلمەي قالاسىڭ. ءبىز بولساق، قازىرگى اقپاراتتىق تەxنولوگيالاردى بالامەن ءبىر دەڭگەيدە مەڭگەرۋگە تىرىسپايمىز. ال شەتەلدە كەز كەلگەن اجە سمارتفوندى پايدالانۋدى بىلەدى. كومپيۋتەردىڭ قۇلاعىندا ويناپ، پوشتا ارقىلى حات الماسىپ وتىرادى. اتا- انالار بىلاي تۇرسىن اجەلەردىڭ ءوزى ءبارىن بىلەدى، - دەيدى ز. بالييەۆا.

ايتا كەتەيىك، فورۋم رەسپۋبليكالىق دەڭگەيدە العاش رەت ءوتىپ وتىر. الايدا شارانى وتكىزۋدىڭ باستى يدەياسى وسىدان ءۇش جىل بۇرىن استانا قالاسىنىڭ №59 -مەكتەبىنىڭ بازاسىندا پايدا بولعان. وسى ۋاقىت ىشىندە اكەلەردىڭ ەكى قالالىق سلەتى وتكىزىلگەن.

كەشە دەپۋتات بەس بالا اسىراپ الاتىنىن ايتقان بولاتىن.