دەپۋتات زاعيپا باليەۆا اتا-اجەلەرگە كومپيۋتەر ۇيرەنۋگە كەڭەس بەردى
وسى ورايدا ول ءوز نەمەرەسىنىڭ تاربيەسىنە نەمقۇرايلى قارامايتىن قاريالارعا تەگىن كومپيۋتەرلىك كۋرستارعا قاتىسۋعا كەڭەس بەردى، دەپ حابارلايدى قازاقپارات ءتىلشىسى.
دەپۋتات باليەۆانىڭ ايتۋىنشا، اتا-انالار ءوز بالالارىنا "ماحاببات" (ەكى ادامنىڭ اراسىنداعى - اۆت.) دەگەن ءسوزدىڭ ءمان-ماعىناسىن جەتكىزە ءبىلۋى كەرەك. ايتپەسە، قازىرگى بالالار اقپاراتتىق ساۋاتتىلىعىن، سونىڭ ىشىندە جىنىستىق قاتىناس تۋرالى بارلىق مالىمەتتى عالامتوردان الىپ، مۇلدەم باسقا كوزقاراستا قالىپتاسىپ كەلەدى. ال وتباسىدا جىنىستىق اۋرۋلاردىڭ زيانىن ەشكىم تۇسىندىرمەيدى، كوپ جاعدايدا، ايتۋعا دا ۇيالادى.
«اشىعىن ايتۋ كەرەك، ءبىز ءوز بالالارىمىزدان قالىپ قويدىق. ولار عالامتوردا كوپتەگەن الەۋمەتتىك جەلىلەردى شارلاپ جۇرەدى. ال اتا- اناسى جاقىنداي قالسا، نوۋتبۋگىن بىردەن جاۋىپ تاستايدى. سول كەزدە ونىڭ نە ىستەگەنىن، قاي سايتتا وتىرعانىن بىلمەي قالاسىڭ. ءبىز بولساق، قازىرگى اقپاراتتىق تەحنولوگيالاردى بالامەن ءبىر دەڭگەيدە مەڭگەرۋگە تىرىسپايمىز. ال شەتەلدە كەز كەلگەن اجە سمارتفوندى پايدالانۋدى بىلەدى. كومپيۋتەردىڭ قۇلاعىندا ويناپ، پوشتا ارقىلى حات الماسىپ وتىرادى. اتا- انالار بىلاي تۇرسىن اجەلەردىڭ ءوزى ءبارىن بىلەدى»، - دەدى ز. باليەۆا ءوزىنىڭ قۇتتىقتاۋ سوزىندە.
وسى ورايدا ول حالىقتىڭ كومپيۋتەرلىك ساۋاتتىلىعىن كوتەرۋگە ارنالعان مەملەكەتتىك شارالار جايىندا ايتىپ، جۇمىسپەن قامتۋ ورتالىقتارى جانىنان تەگىن كومپيۋتەرلىك كۋرستاردىڭ اشىلعانىن ەسكە سالدى. «ۇيالماڭىزدار، وقۋ-ءبىلىم ءۇشىن ءبارى كەش دەپ ايتۋعا بولمايدى. مەن اتا-انالار تۋرالى ايتىپ تۇرعان جوقپىن، مەن اتا-اجەلەر جايىندا ايتىپ وتىرمىن. جۇمىسپەن قامتۋ ورتالىعىنا بارىپ، سول كۋرستارعا جازىلعان ءجون. سىزدەر نەمەرە-شوبەرەلەرىڭىزبەن بىردەي بولۋلارىڭىز قاجەت. اعىلشىن ءتىلى، قازاق ءتىلى كۋرستارى بار. سونىڭ ءبارى تەگىن عوي. وسى جەردە وتىرعانداردىڭ بىرەۋى بولسا دا، ول كۋرستارعا جازىلدى ما؟ وعان بيۋدجەتتەن اقشا ءبولىندى. ۋاقىت تاۋىپ، نەمەرە ءۇشىن كۋرستارعا بارىڭىز»، - دەپ ۇندەۋ تاستادى ز. باليەۆا.
