كونسەرت بەرگەن شاھيزادا كيىمدەرىن ساحنادا تۇرىپ اۋىستىردى

الماتى. قازاقپارات - «اققۋ ارمان» اتتى ءانى ءانشى شاھيزادا بايپاتشانوۆانى ەلگە تانىتىپ، جۇلدىزىن جاقتى.

بۇگىندە ونەر يەسىنىڭ ءان الەمىندە جۇرگەنىنە 30 -جىل تولدى. ول وسىعان وراي كونسەرت بەرۋدى ءجون كورىپتى.

بۇل تۋرالى 31 ارنا حابارلايدى.

وسى ءبىر اتاۋلى مەرەكەسىن ءانشى 16 جىل بويى كۇتتى. سوندىقتان بولار، مەرەيتويلىق كەشىن ەل ەسىندە قالاتىنداي ەتىپ جاساۋعا تىرىسىپتى. ول ءۇشىن ءانشى قارجىسىن اياماپتى. ءسويتىپ، ميلليونداپ قارجى شىعارىپ، ەلىمىزدەگى ەڭ تاڭداۋلى دەگەن مامانداردى جالداپتى. «40-50 شاقتى ادام جۇگىرىپ ءجۇر. بىرەۋى اناۋىمدى اكەپ بەرەدى، ەكىنشىسى تاعى ءبىر نارسەمدى، -  دەپ شاھيزادا قاسىندا جۇرگەن كومەكشىلەرىنىڭ ەڭبەگىن ەرەكشە باعالادى.

بەت-الپەتىن ارلەپ، شاشىن تۇزەتۋگە ءبىر جارىم ساعات بويى اياقتارىنان تىك تۇرىپ بىرنەشە مامان ءانشىنى ساحناعا دايىنداعان. ءانشى شاھيزادانىڭ 30 جىلدىق كونسەرتىندە ورىندالاتىن اندەرىنىڭ اراسىندا ءۇش بىردەي ستيليست نە ءبارى 2 مينۋتتىڭ ىشىندە ءانشىنى كيىندىرىپ ۇلگەرۋى كەرەك ەكەن. «كەش جۇرگىزۋشىسى بولمايدى. سوندىقتان دا ءانشىنى جىلدام كيىندىرۋ ءبىزدىڭ موينىمىزدا. بىرنەشە كويلەكتى ۇناتپادى. بۇيىمداردى دا سايكەستەندىرىپ كيگىزىپ وتىرامىز»، - دەيدى ستيليست ءازيزا سايموۆا.

شاھيزادانىڭ كەش بويى ساحناعا جارقىراپ شىعۋىن ستيليست ءازيزانىڭ ءوزى ءجىتى قاداعالاپ تۇردى. سەبەبى، ءانشىنىڭ التى اي بويى شوۋ-كونسەرتكە كيەتىن كيىمدەرىن اسا جوعارى تالعاممەن تاڭداپ بەرگەن دە وسى ارۋ. جىلتىراعان تاسپەن كومكەرىلگەن كويلەكتەرىنىڭ ەڭ ارزانى 300 مىڭ تەڭگەنى قۇرايتىن كورىنەدى.

كەشتىڭ شىمىلدىعىن ءانشى «ۋاقىت» دەگەن انمەن اشتى. كەيىن جاڭا تۋىندىلارى «اينا»، «تۋعان جەردى» ورىنداعاندا حالىق قولداپ، قولپاشتاپ وتىردى. ءتىپتى، ەسترادا جۇلدىزدارى: بۇركىت، جەڭىس ىسقاقوۆا، باقىت شادايەۆا، الىشەر كارىموۆ، قايرات نۇرتاسپەن بىرگە دۋەت تە ايتتى. ەكى ساعات ىشىندە ءانشى 22 ءاندى فونوگرامماسىز ورىندادى. ونەرىنە ريزا بولعان حالىق تا گۇل شوقتارىن ايامادى. ال، ءانشى جەڭىس ىسقاقوۆا بولسا، ارىپتەسىنە سىيلىعىن ساحنادا ەمەس، بوياناتىن بولمەدە جەكە تابىس ەتتى.