ساكەن مايعازيەۆ مۇزارتتىڭ تاراماق بولعانىن راستادى
الايدا، جۋىردا ەل اراسىندا وسى توپ تارقايدى دەگەن ءسوز تارادى. بۇل ءسوز قانشالىقتى راس؟ حالىق اراسىندا تاراپ كەتكەن مۇنداي قاۋەسەت جايىندا مۇزارتتىڭ ءوزى نە دەيدى؟
بۇل جايىندا "ZhambylNews" اقپاراتتىق اگەنتتىگى حابارلايدى.
«استانا» تەلەارناسىنان كورسەتىلىپ جۇرگەن «قوش كەلدىڭىز!» اتتى باعدارلامادا مۇزارت توبىنىڭ ءانشىسى ساكەن مايعازيەۆ جوعارىدا اتالعان سۇراقتارعا جاۋاپ بەرىپ، اعىنان جارىلدى. ونىڭ ايتۋىنشا، «مۇزارت» توبىن تاراتۋ جايلى وي حالىقتىڭ ءجاي ويلاپ تاپقانى ەمەس، ولار راسىمەن ءبىر كەزدەرى وسىنداي شەشىمگە كەلگەن. ونىڭ ۇستىنە، «قازاقستان» تەلەارناسى ارقىلى كورەرمەنگە جول تارتقان «مۇزارت LIVE» جوباسى دا كوپشىلىكتىڭ كۇدىگىن ۇدەتە ءتۇستى. بۇل جوبانى تاماشالاعاندار - «اتالعان جوبا ۇزدىك ۇشتىكتىڭ ءىزباسارلارىن دايىندايدى ەكەن» دەگەندى دە شىعاردى.
الايدا، مۇنداي ويدان باس تارتقىزىپ، انشىلەرگە ستيمۋل بەرگەن حالىقتىڭ ىقىلاسى ەكەن. قازاقتىڭ ءانى ارقىلى قازاقتىڭ اتىن الەمگە تانىتىپ جۇرگەن مۇزارتقا قاراپ جاس ونەر يەلەرىنىڭ بوي تۇزەپ كەلە جاتقانى بەلگىلى. سونداي ءانشى ازاماتتار مەن مۇزارت انشىلەرىنىڭ باس قوسقان ءبىر جيىنىندا ساكەن مايعازيەۆ توپتىڭ تارالاتىنى جايىندا ءسوز قوزعاعان.
«سوندا، ءانشى ءىنىمىز تورەعالي تورەالى جارتى ساعاتتاي ءۇنسىز قالعانىن بىرەۋلەر بايقاپ قالىپتى. تورەش، نە بولدى؟ دەگەن سۇراققا مۇزارتتىڭ تارالاتىنى جانىما باتىپ وتىر دەپ جاۋاپ بەردى»، - دەيدى «قوش كەلدىڭىز!» باعدارلاماسىندا ساكەن. وسى سىڭايلى حالىق تاراپىنان كەلگەن سوزدەر، ارەكەتتەر مۇزارت توبىنىڭ ساقتالىپ قالۋىنا كوپ ىقپالىن تيگىزگەن. انشىلەردىڭ وزدەرى الدارىندا «تاراز» تريوسى، «دوسمۇقاسان» انسامبلى سىندى اعا بۋىن انشىلەر ءالى دە حالىقتى قۋانتۋعا نيەتتى بولىپ جۇرگەندە مۇزارت- تىڭ جارتى جولدا «شارشادىق» دەگەنى جاراماس دەپ، ءوز جولدارىن قايتا جالعاستىرۋعا بەل بۋعان.
توپ تارقايدى دەگەندى ەستىگەن حالىق ءۇشىن بۇل جاڭالىق ءۇش بايتەرەگى سىنعانداي ەستىلسە كەرەك. راسىندا، تالاي جىلدان بەرى قوڭىر قازاقي داۋىستارىمەن ەلدىڭ سۇيىكتىسىنە اينالعان ۇشتىك حالىققا ءالى دە قاجەت ەكەنى - جاقسىلىقتىڭ نىشانى بولسا كەرەك-تى.
