ماڭعىستاۋدا پىسىرىلگەن ءتۇرلى پىشىندەگى باۋىرساقتار مۇقتاج وتباسىلارعا تاراتىلدى

استانا. قازاقپارات - بۇگىن اقتاۋدا «دوستىق ءۇيى» عيماراتىندا «قايىرىمدىلىق كەرۋەنى» جالپى ۇلتتىق اكسياسىنىڭ اياسىندا «بىرگە ءومىر ءسۇرۋ ونەرى» اتتى ەتنومادەني بىرلەستىكتەردىڭ شىعارماشىلىق ۇجىمدارىنىڭ جانە اۋعان سوعىسى ارداگەرلەرىنىڭ قاتىسۋىمەن فەستيۆال ءوتتى، دەپ حابارلايدى وبلىس اكىمىنىڭ باسپا ءسوز قىزمەتى حابارلادى.

فەستيۆال اياسىندا ەتنومادەني بىرلەستىك مۇشەلەرى، ورتا جانە شاعىن كاسىپكەرلەر مەن قالا تۇرعىندارى اراسىندا الدىن الا دايىندالعان 25 مەترلىك داستارحانعا قازاق حالقىنىڭ ۇلتتىق تاعامدارىنىڭ ءبىرى باۋىرساق تۇرلەرىنەن كورمە ۇيىمداستىرىلدى.

«فەستيۆالدىڭ ماقساتى - قازاق حالقىنىڭ سالت- ءداستۇرىن قايتا جاڭعىرتۋ جانە ناسيحاتتاۋ. تۇرعىنداردىڭ ادامگەرشىلىك جانە مادەني قۇندىلىقتارىن ساقتاۋ، ەتنوسارالىق جانە ءدىنارالىق قارىم- قاتىناستى نىعايتۋ، حالىقتى ىنتىماققا، قوعاممەن تۇسىنىستىك پەن بىرلىكتە ءومىر سۇرۋگە شاقىرۋ. تۇرعىندار مەن جاستاردى مۇقتاج جانداردىڭ كۇيىنە نەمقۇرايلىلىقپەن قاراماۋعا، قايىرىمدىلىق جاساپ، كومەك قولىن سوزۋعا تارتۋ. از قامتىلعان وتباسىلارعا باۋىرساقتاردى تاراتىپ، قوڭىلدەرىنە نۇر سىيلاۋ»، - دەدى ماڭعىستاۋ وبلىسى قازاقستان حالقى اسسامبلەياسى حاتشىلىعىنىڭ مەڭگەرۋشىسى گۇلجان يسمۋرزينا.

كورمەگە ەتنومادەني بىرلەستىك وكىلدەرى، كاسىپكەرلەر جانە قالا تۇرعىندارى ات سالىستى. قاتىسۋشىلار ءوز باۋىرساقتان ءار ءتۇرلى اسەم پىشىندەر جاسادى. كيىز ءۇي، پيراميدا، كەمەنىڭ مۇسىندەرىمەن قاتار، ەكسپو- عا بايلانىستى پىشىندەر دە جاساپ، كورمەنىڭ كوركىن اشا ءتۇستى. سونداي-اق، باۋىرساقتاردىڭ ءدامى دە ءبىر- بىرىنە ۇقسامايتىن، ءوز ادىستەرىمەن دايىندالعان. سونىمەن قاتار، فەستيۆالدا قولونەر كورمەسى دە بولدى. ەتنومادەني بىرلەستىك وكىلدەرى مەن قالا تۇرعىندارىنان قۇرالعان 6 قاتىسۋشى قولونەر بۇيىمدارىمەن تانىستىردى. فەستيۆال كورمەلەرمەن عانا شەكتەلمەي، اسەم ءان مەن بيگە ۇلاستى.

ءىس- شارا سوڭىندا ارنايى شاقىرىلعان قوناقتار ۇزدىك قاتىسۋشىلارعا ماراپاتتار مەن العىس حاتتار تابىستادى. پىسىرىلگەن باۋىرساقتار از قامتىلعان وتباسىلار مەن مۇقتاج جاندارعا تاراتىلدى. تاعى ءبىر قايىرىمدى ءىس جاسالىپ، اكسيا مىندەتى ورىندالدى.