باس پروكۋراتۋرادا راديكالدىڭ تيپتىك الەۋمەتتىك پسيحولوگيالىق پورترەتىن جاسادى

استانا. قازاقپارات - بۇگىن باس پروكۋرور جاقىپ اسانوۆ اقتوبە وبلىسىنىڭ جۇرتشىلىعىمەن كەزدەسىپ، وندا ۆەدومستۆوارالىق توپ جۇمىسىنىڭ قورىتىندىلارى تۋرالى ايتتى.

«بۇگىنگى كۇنى ءبىز راديكالدىڭ تيپتىك الەۋمەتتىك پسيحولوگيالىق پورترەتىن جاسادىق. بۇل بەينەنىڭ ارتىندا نە كانىگى بانديت نە مارگينال تۇرعانىن انىق بىلەمىز. ايتقانداي، ولاردىڭ كوپشىلىگى يسلامنىڭ نە ەكەنىن بىلمەيدى. قۇراندى وقىماعان نەمەسە ادەيى وقىعىسى كەلمەيدى، جۇمىس ىستەۋگە قۇلقى جوق، وتباسىلىق قۇندىلىقتار مەن مەملەكەت ينستيتۋتتارىن جوققا شىعارادى، بيلىكتىڭ كومەگىنەن باس تارتادى. بۇنى ءتۇسىنۋ بىزگە جاقىن ارادا ولارعا قارسى ءىس- قيمىل جاساۋدىڭ تاسىلدەرىن تۇزەتۋگە مۇمكىندىك بەرەدى.

ەگەر اقپارات بولماسا، توتەنشە جاعداي كەزىندە قانداي دۇربەلەڭ بولاتىنىن ءبارىمىز بىلەمىز. سوندىقتان 500 دەن استام جۋرناليستەر، بلوگەرلەر، باسپا ءسوز حاتشىلارى ءۇشىن ارنايى ترەنينگتەر وتكىزدىك. ولار شيەلەنىستى جاعدايلاردا حابارلاۋ شەبەرلىكتەرىن مەڭگەردى.

ءاربىر ازاماتتىڭ تەراكت نەمەسە ونىڭ قاۋپى كەزىندە نە ىستەۋ كەرەكتىگىن ءبىلۋى ماڭىزدى. بۇل ءۇشىن ءبىر اي ىشىندە ايماقتىڭ 23 مىڭ تۇرعىنىمەن 199 ءىس- شارا وتكىزدىك. بۇل داعدىلارعا سونداي- اق 2,5 مىڭ مەكتەپ وقۋشىسى مەن ولاردىڭ مۇعالىمدەرى ۇيرەندى. ولار ءۇشىن 30 ساباق وتكىزىلدى.

قوعامدىق ورىنداردا 12 مىڭ تۇرعىنعا تاقىرىپتىق كورنەكى بۋكلەتتەر تاراتتىق. ادامدارعا تەراكت قاۋپى نەمەسە ول جاسالعان كەزدە نە ىستەۋ كەرەكتىگىن، بۇل تۋرالى كىمگە جانە قانداي ارنالار ارقىلى حابارلاۋ كەرەكتىگىن، بۇنداي جاعدايدا ءوزىڭدى جانە جاقىندارىڭدى قالاي قورعاۋ قاجەتتىگىن ايقىن تۇسىندىردىك.

تەراكتىلەردەن قورعانۋ جۇيەسىن 49 وبەكتىدە جۇرگىزدىك. ولاردىڭ جۇمىسشىلارىنا ت ج تۋىنداعان كەزدە جاسالاتىن ارەكەتتەردى ۇيرەتتىك»، - دەدى ول.