پاۆلوداردا اناسى اياۋسىز ساباعان ءۇش جاسار قىزدى جەتىمدەر ۇيىنەن اكەسى الىپ كەتتى
ەسكە سالساق، Instagram الەۋمەتتىك جەلىسىندە اناسى ءۇش جاسار قىزىن ۇرىپ جاتقان ۆيدەو شىقتى، وعان قۇقىق قورعاۋ ورگاندارى، پاۆلودار وبلىسىنىڭ ءبىلىم باسقارماسىنىڭ باسشىسى بىردەن دەن قويدى. كەيىن انىقتالعانداي، 32 جاستاعى ايەلدىڭ ەكى قىزى بار ەكەن. ۇلكەنى 2-سىنىپتا وقيدى. اكە-شەشەسىنىڭ نەكەسى تىركەلمەگەن. ءبىراق وتباسى بالالارعا بارلىق قاجەتتى جاعدايمەن اباتتاندىرىلعان ءۇش بولمەلى پاتەردە تۇرىپ جاتقان.
قىزىن ۇرعان ايەلگە قاتىستى سوت الدى تەرگەۋ ءجۇرىپ جاتىر. ۆيدەو سەيسەنبى جاريالاندى. بۇگىن اكەسى قىزىن جەتىمدەر ۇيىنەن الىپ كەتتى. ءبىرىنشى نەكەدەن تۋعان ۇلكەن قىزى ناعاشى اجەسىنىڭ قولىندا. «قامقورلىق كەڭەسى اكەسى قىزىن الىپ كەتۋ ءۇشىن وڭ شەشىم شىعاردى. ادەتتە كوميسسيا تۇرعىن ءۇي اكتىسىن، ۋچاسكەلىك قىزمەتكەردىڭ مىنەزدەمەسىن، جۇمىس ورنىنان انىقتاما، باسقا دا قۇجاتتاردى قارايدى. ءىس اتا- انا قۇقىعىنان ايىرۋ نەمەسە شەكتەۋ شەشىمىن شىعارۋ ءۇشىن سوتقا بەرىلدى»، - دەدى وبلىستىق ءبىلىم باسقارماسى باسشىسىنىڭ ورىنباسارى ە. داۋرەنوۆ. قىزدىڭ اناسى بالاسىن اياۋسىز ۇرعانى ءۇشىن كەشىرىم سۇراعان تاعى ءبىر ۆيدەو جازعان كورىنەدى.
