دوپينگ قولدانعان سپورتشىلاردى قانداي جاۋاپكەرشىلىك كۇتىپ تۇر؟ - كەسكىن
دوپينگ داۋىنا ىلىككەن سپورتشىلارعا كوزقاراس قانداي؟ ولار وليمپيادا ويىندارىندا جەڭىمپاز اتانعانى ءۇشىن مەملەكەتتەن العان سىياقىلارى مەن ناگرادالارىن قايتارۋى كەرەك پە؟ دوپينگ قولداندى دەپ تانىلعان سپورتشىلارعا قانداي دا ءبىر جازا قولدانىلا ما؟ قازاقستان زاڭناماسىندا وسىنداي جاعدايعا قاتىستى قانداي باپ بار؟ وسى ساۋالدارعا AzattyqLIVE ستۋدياسىندا رەسپۋبليكالىق سپورت كوللەدجىنىڭ ديرەكتورى امالبەك تشان جاۋاپ بەردى.
2008 -جىلعى پەكين، 2012 -جىلعى لوندون وليمپيادالارىنا قاتىسىپ، التىن مەدال العان اتلەتتەرگە - 250 مىڭ، كۇمىس جۇلدە العاندارعا - 150 مىڭ، قولا مەدال جەڭگەندەرگە 75 مىڭ ا ق ش دوللارى بەرىلدى. كەيبىر جەڭىمپازدارعا «پاراسات»، «قۇرمەت»، «بارىس»، «وتان» سىندى مەملەكەتتىك ناگرادالار تابىستالدى.
الايدا بىرنەشە جىلدان كەيىن اتالعان وليمپيادالاردا جۇلدەلى بولعان سپورتشىلاردىڭ كەيبىرىنىڭ دوپينگ قولدانعانى انىقتالدى. ءزۇلفيا چينشانلو، مايا مانەزا جانە سۆەتلانا پودوبەدوۆا لوندون وليمپياداسى التىندارىن قايتاراتىن بولدى. يليا يلينگە قاتىستى شەشىم ءالى شىققان جوق. قازاقستان وليمپيادا كوميتەتى «ادال سپورت» ساياساتىن قولداپ، حالىقارالىق وليمپيادا كوميتەتىنىڭ شەشىمدەرىمەن كەلىسەتىنىن مالىمدەدى.
