الماتى وبلىسىندا ولتىرىلگەن اعايىندىلاردىڭ ولىمىنە قاتىستى تەرگەۋ اياقتالدى - ادۆوكات

استانا. قازاقپارات - الماتى وبلىسىندا ولتىرىلگەن جارقىنبەك دولداننىڭ، مۇقيات زارىلحانوۆتىڭ جانە ءالىمحان قادىلبەكتىڭ ءولىمى بويىنشا ءىس الماتى وبلىسىنىڭ پروكۋراتۋراسىنا جىبەرىلدى.

بۇل تۋرالى Tengrinews.kz تىلشىسىنە كۇدىكتىلەردىڭ ءبىرى مۇرات وڭالبايەۆتىڭ ادۆوكاتى مەركەبەك ماكەنبايەۆ ايتتى. سونداي-اق، ءۇش ەر ادامنىڭ ولىمىنە قاتىسى بار دەلىنگەن تالعات سۇلەيمانوۆتىڭ ۇستالعانى بەلگىلى.

ادۆوكات بۇل ءىستىڭ پروكۋراتۋراعا ايىپتاۋ اكتىسىن بەكىتۋ ءۇشىن جىبەرىلگەنىن ايتتى. «دۇيسەنبىدە، 24 -قازاندا ءبىز ءىس ماتەريالدارىمەن تانىسىپ، سوتقا دەيىنگى تەرگەۋ جۇمىستارىنىڭ اياقتالۋىنا قاتىستى قۇجاتتارعا قول قويدىق. ەكى كۇدىكتى ق ر قىلمىستىق كودەكسىنىڭ 99-بابى بويىنشا ايىپتالسا، تاعى بىرەۋى «قىلمىس تۋرالى حابارلاماۋ» بابى بويىنشا ايىپتى دەپ تانىلدى. ءىس الماتى وبلىسىنىڭ پروكۋراتۋراسىنا ايىپتاۋ اكتىسىن بەكىتۋ ءۇشىن جىبەرىلدى»، - دەدى ادۆوكات.

ەسكە سالايىق، قىركۇيەك ايىندا تالدىقورعان قالاسىنا جاقىن ماڭداعى كوكسۋ اۋدانىنىڭ 3 تۇرعىنى الماتى جاقتاعى ۇزىناعاش بازارىندا مال ساتامىز دەپ ءىز-ءتۇسسىز جوعالىپ كەتكەن بولاتىن.

كەيىنىرەك ولاردىڭ ءولى تابىلعانى حابارلانعان ەدى. ۆەدومستۆوداعىلاردىڭ ايتۋىنشا، مارقۇمداردىڭ دەنەسىندە زورلىق بەلگىلەر بار. پوليتسەيلەر كىسى ءولتىردى دەگەن كۇدىكتىلەردى ۇستاپتى. ولار جامبىل اۋدانىنىڭ ەكى تۇرعىنى. قازىرگى ۋاقىتتا ق ر قىلمىستىق كودەكسىنىڭ 99-بابى («ادام ءولتىرۋ») بويىنشا سوتالدى تەرگەۋ باستالىپتى. كۇدىكتىلەر ۋاقىتشا ۇستاۋ يزولياتورىنا قامالدى. ايتا كەتەيىك، ۇستالعاندار ەكى ايعا قاماۋعا الىندى - 24 -قاراشاعا دەيىن.