ادۆوكاتتار سۆەتلانا پودوبەدوۆا، مايا مانەزا مەن زۋلفيا چينشانلونىڭ جارىسقا قاتىسۋ مەرزىمىن جۇمسارتۋعا ءۇمىتتى
«حالىقارالىق وليمپيادا كوميتەتى دوپينگ سىنامادا تىيىم سالىنعان زاتتار تابىلعان 2012 -جىلعى وليمپيادا چەمپيوندارى - قازاقستاندىق اۋىر اتلەتتەرگە قاتىستى قولدانىلعان سانكسيا تۋرالى رەسمي شەشىم شىعاردى.
ح و ك تارتىپتىك كوميسسياسىنىڭ شەشىمىنە سايكەس ح و ك لوندوندا جازعى وليمپيادالىق ويىنداردا جارىسقا قاتىسقان سۆەتلانا پودوبەدوۆا، مايا مانەزا، زۋلفيا چينشانلونىڭ كورسەتكەن ناتيجەلەرىن جوققا شىعاردى. مەدال مەن ديپلومداردى قايتارىپ الدى»، - دەلىنگەن ا ا ف حابارلاماسىندا.
ق ر اۋىر اتلەتيكا فەدەراتسياسىنىڭ باستاماسىمەن قۇرىلعان زەرتحانالىق تالداۋلار سالاسىنداعى ادۆوكاتتار مەن ماماندار توبى بۇدان بۇرىن قازاقستاندىق سپورتشىلاردىڭ تالداۋ ناتيجەلەرىن بىرنەشە اي بويى ەگجەي-تەگجەيلى زەردەلەدى. «الايدا ماماندار دوپينگ سىنامانى قايتا تەكسەرۋ ۇردىسىندە ولقىلىق تابا المادى، سونىڭ سالدارىنان قازاقستاندىق اۋىر اتلەتتەردىڭ وليمپيادالىق جۇلدەلەرىن قورعاپ قالۋ مۇمكىن بولمادى.
ادۆوكاتتار توبى اتلەتتەردىڭ الەمدىك جانە قۇرلىقتىق بىرىنشىلىكتەردە يەلەنگەن مەدالدارى مەن اتاقتارىنا قاتىستى مۇددەلەرىن قورعاۋدى جالعاستىرادى، سونداي-اق سپورتشىلاردى جارىسقا قاتىسۋ قۇقىعىنان ايىرۋ مەرزىمىن جۇمسارتۋ ءۇشىن شارالار قابىلدايدى»، - دەپ اتاپ ءوتتى فەدەراتسيادان. ەسكە سالساق، كورسەتىلگەن ماسەلەلەر ح ا ا ف قۇزىرەتىنە كىرەدى.
