وسكەمەندە اۆتوقوقىس قابىلدايتىن بولىمشە اشىلادى

استانا. قازاقپارات - كوپ ۇزاماي كونەرگەن اۆتوكولىك يەلەرى ەسكى كولىك وتەماقى الاتىن بولادى.

مەملەكەت اۆتوكولىك يەلەرى كولىكتەرىن قايتا وڭدەۋگە بەرەتىن باعدارلامانى ىسكە قوسادى، دەپ حابارلادى قازاقپارات ustinka.kz پورتالىنا سىلتەمە جاساپ.

قولدانىستان شىعىپ قالعان كولىكتەر قازاقستاننىڭ 15 قالاسىندا قابىلدانادى. جاقىن كۇندەرى مۇنداي بولىمشە وسكەمەن قالاسىندا دا اشىلادى. «قاڭىلتىر قوقىستاردى» جيناۋ الاڭىنىڭ ناقتى قاي جەرگە ورنالاسارىن وبلىستىق ەكولوگيا دەپارتامەنتى دە، تابيعي رەسۋرستار مەن تابيعاتتى پايدالانۋدى رەتتەۋ باسقارماسى دا ازىرگە بىلمەيدى.

ەكى مەكەمە دە ق ر ەنەرگەتيكا مينيسترلىگى باستاما كوتەرگەن جاڭا باعدارلامانىڭ ءالى دە ناقتىلانىپ جاتقانىن حابارلادى. دەسە دە، وتەماقى كولەمى بەلگىلى بولدى. جىل اياعىنا دەيىن «وپەراتور روپ» ج ش س (اۆتوقوقىستاردى جيناۋمەن اينالىساتىن كومپانيا) قازاقستاندىقتاردان 10 مىڭ جارامسىز كولىك قابىلداۋدى جوسپارلاپ وتىر.

وپەراتوردىڭ حابارلاۋىنشا، ەڭ الدىمەن جەڭىل اۆتوكولىكتەر قابىلدانادى. وتەماقى كولەمى اۆتوكولىكتىڭ جيىنتىعىنا بايلانىستى. ەگەر كولىكتىڭ تەك قانا كۋزوۆى، ەسىكتەرى، قوزعالتقىشى مەن بەرىلىس قورابى بولسا، قوجايىنىنا 48 مىڭ تەڭگە بەرىلەدى. ال ەگەر كولىك جيىنتىعى ودان باي بولسا، ياعني كاپوت، جۇكسالعىش قاقپاعى، رادياتور، دوڭگەلەكتەرى، اككۋمۋلياتور، بەنزين باگى نەمەسە گاز ىدىسى بولسا، قوزعالىس قۇرالى ءۇشىن 150 مىڭ تەڭگە الۋعا بولادى. سونىمەن بىرگە، ءبىر ادامنىڭ بىرنەشە كولىك وتكىزۋىنە بولادى، كولىكتىڭ قانشا ۋاقىتتان بەرى مەنشىگىندە بولعانى ماڭىزدى ەمەس.