بوكس كەشى: قازاقستاندىقتاردىڭ قارسىلاستارى بەلگىلى بولدى

استانا. قازاقپارات - بۇگىن قانات يسلام مەن پاتريك اللوتەي سالماق ولشەۋ راسىمىندە، ەرتەڭ بولاتىن باستى بوكس كەشىنىڭ وزگە دە قاتىسۋشىلارى سالماق ولشەدى.

بۇل شارادا قازاقستاندىق بوكسشىلاردىڭ قارسىلاستارى، سپورتشىلاردىڭ سالماقتارى بەلگىلى بولدى، دەپ حابارلادى قازاقپارات ءتىلشىسى.

قانات يسلام مەن پاتريك اللوتەيدىڭ جەكپە-جەگىندە قولعاپ تۇيىستىرەتىن قازاقستاندىق بوكسشىلار: جانىبەك ءالىمحان ۇلى، جانقوش تۇراروۆ، رۋسلان مىرساتايەۆ، الي احمەتوۆ، ايدار شارىبايەۆ، جۇمان جۇمابەكوۆتىڭ قارسىلاستارى بەلگىلى بولدى.

ناقتىراق ايتقاندا، ريو وليمپياداسىنىڭ قاتىسۋشىسى جانىبەك ءالىمحان ۇلى ا ق ش سپورتشىسى ميلتون نۋنەزبەن قولعاپ تۇيىستىرەدى. 79 كەلى سالماقتا ولار 6 راۋند بوكستاسادى.

جانقوش تۇراروۆ گانالىق ازەك اريمەن 66 كەلىدە 10 راۋند كۇش سىناسادى.

بۇگىنگى سالماق ولشەۋ راسىمىندە 99 كەلىنى كورسەتكەن وتانداسىمىز رۋسلان مىرساتايەۆ گانالىق نۋحۋ ازۋميمەن (103 كەلى) قولعاپ تۇيىستىرەدى. ولارعا 10 راۋند بەرىلىپ وتىر.

 قازاقستاندىق ءالي احمەتوۆ (78 كەلى) ازەربايجاندىق ءالي ماممەدوۆپەن (77 كەلى) 6 راۋندقا جەكپە-جەككە شىعادى.

وتانداسىمىز ايدار شارىبايەۆ (60 كەلى) يسپانيالىق حۋان ۆەنەنو وكۋرومەن (59 كەلى) 6 راۋندقا جەكپە-جەككە شىعادى.

ال جۇمان جۇمابەكوۆ (63 كەلى) بەلارۋس بوكسشىسى ۆلاديمير يۆانوۆپەن (63 كەلى) 4 راۋندا كۇش سىناسادى.

ەسكە سالا كەتەيىك، الماتىدا 29- قازان كۇنى «الماتى ارەنا» سپورت سارايىندا قانات يسلام مەن پاتريك اللوتەي WBA (Interim)  تۇجىرىمى بويىنشا الەم چەمپيونى اتاعىنا تالاسادى.

ءبىرىنشى ورتا سالماقتا «WBA Fedelatin» اتاعىنا يە قانات يسلام وسى ۋاقىتقا دەيىن 21 كەزدەسۋ وتكىزىپ، بارلىعىندا جەڭىسكە جەتكەن. ونىڭ 18 ءىن نوكاۋتپەن ۇتقان.

پاتريك اللوتەي وسىعان دەيىن كاسىپقوي شارشى الاڭدا 36 جەكپە-جەك وتكىزگەن. ونىڭ 34 ىندە قارسىلاستارىنان باسىم تۇسكەن. ونىڭ 24 ىندە قارسىلاستارىن نوكاۋتپەن ۇتسا، 2 جەكپە-جەگىندە عانا قارسىلاستارىنا ەسە جىبەرگەن. سوڭعى رەت 24- ماۋسىم كۇنى شارشى الاڭعا شىعىپ، وتانداسى ساني يدانانى جەڭگەن. جەكپە-جەكتەرىنىڭ بارلىعىن دەرلىك گانادا وتكىزگەن. ءۇش كەزدەسۋى عانا وزگە ەلدە وتكەن. كاسىپقوي بوكستا «ۋلى جەبە» دەگەن لاقاپ اتقا يە.

32 جاستاعى قانات يسلام بۇل جەكپە-جەككە جاتتىقتىرۋشىسى نەلسون لوپەسپەن بىرگە الماتىداعى AIBA (حالىقارالىق اۋەسقوي بوكسفەدەراتسياسى) بوكس اكادەمياسىندا جاتتىقتى.

قانات يسلام بۇل كەزدەسۋدەن كەيىن جىل سوڭىنا دەيىن امەريكا قۇرلىعىندا تاعى ءبىر جەكپە-جەك وتكىزۋدى جوسپارلاپ وتىرعانىن بۇعان دەيىنگى ب ا ق- پەن كەزدەسۋىندە ايتقان بولاتىن. ول 2017-جىلى «كەم دەگەندە ءتورت كەزدەسۋ وتكىزبەك.

قانات يسلام اللوتەيگە دەيىن 2016-جىلعى 9-مامىردا فلوريدا شتاتىندا كولۋمبيالىق حۋان دە انحەلمەن كەزدەسىپ، التىنشى راۋندتا جەڭىسكە جەتكەن.

قىتايدا تۋعان قانات يسلام سول ەلدىڭ اتىنان بەيجىڭ وليمپياداسىنا قاتىسىپ، قولا مەدال يەلەنگەن. وسى وليمپيادادان كەيىن ول قازاقستانعا قونىس اۋدارعان. قانات يسلام 2012-جىلعى لوندون وليمپياداسىنا قازاقستان اتىنان قاتىسپاق بولعان كەزدە ازاماتتىق-قۇقىقتىق داۋ تۋعان سوڭ كاسىپقوي بوكسقا بەت بۇرعان. كەيىن ماياميگە (ا ق ش) بارىپ، نەلسون لوپەستىڭ پروۋموۋتەرلىك كومپانياسىمەن كەلىسىمشارت جاساسقان. قازىر قانات يسلامنىڭ بارلىق كەزدەسۋىن وسى كومپانيا ۇيىمداستىرىپ ءجۇر.