اۆستريادا ەۋروپالىق وركەستر قازاق مۋزىكاسىن ورىندادى
«قازاقستان مارجاندارى» جوباسى اياسىندا ۇيىمداستىرىلعان كونسەرت باعدارلاماسىندا قۇرمانعازى، ت. قاجىعاليەۆ، ە. قاناپيانوۆ، ا. سەركەبايەۆ، ن. تىلەنديەۆتىڭ تۋىندىلارى وينالدى. كونسەرت ۇلكەن تابىسپەن ءوتتى. اۋستريالىق قوعام تانىمال وركەستردىڭ ونەرىن اسەرلەنىپ قابىلدادى. شارانى قازاقستاننىڭ اۋسترياداعى ەلشىسى قايرات سارىباي اشتى. كونسەرتتىك باعدارلاما اياقتالعان سوڭ دا قالىڭ كورەرمەن مۋزىكانتتاردى جىبەرمەي قويدى، «براۆو» دەگەن ۇندەۋلەردەن كەيىن وركەستر تاعى دا اسپاپتارىن قولعا الدى.
بۇعان دەيىن Tengrinews.kz Young Eurasian Soloists (YES) قۇرامىندا جاس تا بولسا مۋزىكا الەمىنە تانىمال اسپاپشىلاردىڭ بار ەكەنىن حابارلاعان ەدى. ۇجىمدا شۆەيتساريا، يتاليا، گەرمانيا، فرانسيا، ۆەنگريا، پولشا، لاتۆيا جانە رەسەي مەن جاپونيا ەلىنىڭ وكىلدەرى بار. وركەستردىڭ كوركەمدىك جەتەكشىسى تانىمال قازاقستاندىق سكريپكاشى، گ. ۆەنياۆسكيي جانە د. ويستراح اتىنداعى حالىقارالىق بايقاۋلاردىڭ لاۋرەاتى، تارلان سىيلىعىنىڭ يەگەرى شەرنياز مۇساحان.
2015-جىلى Young Eurasian Soloists كامەرالىق وركەسترىنىڭ قۇرىلۋى مۋزىكا الەمىندەگى ايتۋلى وقيعا بولدى. قازىر ۇجىم ەۋروپاداعى ءتۇرلى فەستيۆالدەر مەن جوبالاردان شاقىرتۋ الىپ جاتىر. 2015-جىلدىڭ قازان ايىندا وركەستردىڭ تسيۋريح پەن بەرندەگى كونتسەرتتەرى جوعارى دەڭگەيدە ءوتتى. 2016-جىلدىڭ تامىز ايىندا وركەستر بەدەلدى Sion Fest ەۋروپالىق فەستيۆالىنە قاتىستى. اتالعان مادەني فورۋمعا YES كامەرالىق وركەسترىن شاقىرۋدىڭ ءوزى ەۋروپا مۋزىكاسۇيەر قوعامىنىڭ جاس ۇجىمدى مويىنداعانىن بىلدىرەدى.
ءوز كەزەگىندە موناكو حانشايىمى كارولينا ميۋرات YES وركەسترىن 2017-جىلى قاڭتار ايىندا گشتاد (شۆەيتساريا) قالاسىندا وتەتىن جاڭا جىلدىق مۋزىكا فەستيۆالىنە شاقىردى.
