جەمقورلىققا قارسى قىزمەتتە ءبىر ادامنىڭ ۇزاق وتىرعانى دۇرىس ەمەس - جاقسىبەكوۆ

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ كەڭەيتىلگەن ماجىلىسىندە پرەزيدەنت اكىمشىلىگىنىڭ باسشىسى ادىلبەك جاقسىبەكوۆ الدىمەن اگەنتتىك قىزمەتكەرلەرىنىڭ ءوز ىشىندە جەمقورلىققا جول بەرمەۋ كەرەكتىگىن جەتكىزدى.

 ءسويتىپ، اتالعان ۆەدومستۆونىڭ بۇرىنعى يميدجىن وزگەرتىپ، حالىقتىڭ وعان دەگەن سەنىمىن ارتتىرعان ءجون، دەپ حابارلايدى قازاقپارات.

«كۇنى كەشە كادر ماسەلەسى بويىنشا ۇلتتىق كوميسسيانىڭ وتىرىسىندا ءبىز سىبايلاس جەمقورلىققا قارسى كۇرەس جونىندەگى ۇلتتىق بيۋرونىڭ (اگەنتتىكتىڭ قۇرامىنا كىرەتىن قۇرىلىم - اۆت.) ايماقتىق ورگاندارىنىڭ باسشىلىعىن بەكىتتىك. شىنى كەرەك، جاقسى كادرلار. مەنىڭشە، ولاردى تاڭداعاندا مەريتوكراتيا نەگىزدەرى، ياعني ادامنىڭ جەكە ەڭبەگى، قابىلەتى مەن تاجىريبەسى بارىنشا ەسكەرىلدى. باسشىلىققا كاسىبي ادامدار كەلدى دەۋگە ابدەن بولادى. ەندى، كوبىسىن اۋىستىردى، روتاتسيا (جاڭا ادامداردى تاعايىنداۋ - اۆت.) بولدى. ول دا دۇرىس. سەبەبى ونداي جەردە ءبىر ادامعا ۇزاق ۋاقىت وتىرا بەرۋگە بولمايدى. اتالعان قىزمەتتىڭ ادامدارى جۇمىسىن اۋىستىرۋعا ءاردايىم دايىن بولۋى شارت»، - دەيدى ءا. جاقسىبەكوۆ.

وسى ورايدا پرەزيدەنت اكىمشىلىگىنىڭ باسشىسى اگەنتتىكتىڭ قۇرىلۋ تاريحىنا، ونىڭ اتاۋىن بىرنەشە رەت اۋىستىرىپ، ءبىراز قۇرىلىمدىق وزگەرىستەردىڭ بولعانىن ەسكە الدى. سول كەزدە جەمقورلىققا قارسى قىزمەتتىڭ قاتارىندا زاڭ بۇزعان شەنەۋنىكتەردىڭ ىستەگەنى دە حالىقتىڭ ەسىندە. سونىڭ سالدارىنان قازىرگى جەمقورلىققا قارسى ۇلتتىق بيۋرونىڭ يميدجى بۇزىلدى.

«ەندى، جاڭادان تاعايىندالعان باسشىلىقتىڭ (ايماقتىق باسشىلار - اۆت. ) نەگىزگى مىندەتى - سول يميدجدى وزگەرتۋ. حالىق سىزدەرگە سەنۋى ءتيىس»، - دەپ اتاپ كورسەتتى پرەزيدەنت اكىمشىلىگىنىڭ باسشىسى.

اۆتور: ارمان اسقاروۆ