شەتەل تۋريستەرىن قازاقتاردىڭ تاريحى مەن مادەنيەتى قىزىقتىرادى
بۇل تۋرالى بۇگىن استانادا قازاقستان قوناق ۇيلەرى مەن مەيرامحانالارى قاۋىمداستىعىنىڭ پرەزيدەنتى راشيدا شايكەنوۆا ءمالىم ەتتى.
«اكىمشىلىك مۇمكىندىكتەر مەن ەلدەگى تۋريزم يدەولوگياسى تۇرعىسىندا تۋريزم مارتەبەسىن ارتتىرۋ كەرەك بولىپ تۇر، ياعني بارشامىز قازاقستاندا تۋريزمگە بەلسەندى تۇردە نازار اۋدارۋىمىز قاجەت»، - دەپ توقتالدى ر. شايكەنوۆا ورتالىق كوممۋنيكاتسيالار قىزمەتىندە وتكەن قازاقستاننىڭ ىشكى تۋريزمىن دامىتۋعا ارنالعان دوڭگەلەك ۇستەلدە.
ونىڭ پايىمىنشا، تۋريزم سالاسىنا سالاعا جاۋاپ بەرەتىن دەپارتامەنتتىڭ دە مارتەبەسىن كوتەرۋ قاجەتتىگى تۋىنداپ وتىر. وسى رەتتە وندا بىلىكتى مامانداردىڭ سانىن كوبەيتۋگە دە ءمان بەرگەن دۇرىس.
«ىشكى تۋريزمگە توقتالاتىن بولساق، بۇل تۇرعىدا قازاقستان ازاماتتارىن قانداي ونىمدەر مەن قىزمەتتەر قىزىقتىراتىنىن ءجىتى ءبىلۋىمىز كەرەك. ءاربىر ەكى جىلدا بۇل سالاداعى سۇرانىسقا بايلانىستى زەرتتەۋ جۇرگىزەمىز. وسى ورايدا ءاردايىم جاعاجاي تۋريزمى ءبىرىنشى ورىندا كەلەدى، ياعني بۇل باعىت ەل ازاماتتارى ءۇشىن ەڭ كوپ سۇرانىسقا يە بولىپ وتىر. 2014 -جىلى زەرتتەۋ بارىسىندا جاعاجاي تۋريزمىمەن قاتار، ەمدەۋ- ساۋىقتىرۋ ءتۋريزمىنىڭ ۇلەسى ارتا باستاعانىن اڭعاردىق. سوندىقتان دا بۇگىندە ىشكى ءتۋريزمدى دامىتۋدا اتالعان ەكى سەگمەنكە قولداۋ جاساۋ قاجەت»، - دەدى ر. شايكەنوۆا.
سونىمەن قاتار ول بۇگىندە قازاقستاندىق تۋريستەر كورسەتىلەتىن قىزمەتتەردىڭ ساپاسىنا ايرىقشا ءمان بەرەتىنىن ، وسى رەتتە سالادا قىزمەت ەتەتىندەر بۇل ماسەلەگە نازار اۋدارۋى تيىستىگىن قاداپ ايتتى.
«ال ەلىمىزگە ساپارلاپ كەلەتىن شەتەلدىك تۋريستەرگە قازىرگى كەزدە ءارالۋان تابيعاتىمىزدى جانە ەرەكشە مادەنيەتىمىزدى، سالت- ءداستۇرىمىزدى ۇسىنا الامىز. ياعني وسى باعىتتا حالىقارالىق تۋريستەرگە ەلىمىزدىڭ وزىندىك ەرەكشەلىگى، تاريح پەن مادەنيەت، تۇركى وركەنيەتى قىزىقتى. اتاپ ايتقاندا، بۇنداي ەرەكشەلىكتەرمەن ءبىز ماقتانا الامىز»، - دەدى قاۋىمداستىق پرەزيدەنتى.
